Pengajar ulih ngena awak ngabang Krismas ngempitka kaul
KUCHING: Pengawa ngabang nyerumba Hari Krismas peluang ti engkeman endur mensia mayuh nyengkaum bala pengajar ngempitka agi kaul sesama pengajar kelimpah ari ulih bekunsi peneleba enggau penemu.
Nitihku pengajar Dumih James ti ngajar ba SK Sibu Jaya, Sibu madahka, nengah pengerami rumah tebuka Hari Krismas nya peluang endur ngempitka agi kaul enggau pangan diri.
“Ba Hari Krismas tu mega bala pengajar bisi peluang ngempitka agi kaul ti ukai semina sesama pengajar tang mungkur diri sebilik.
“Pengawa gempuru enggau bala bakih ke sama gawa sereta diri sebilik, berupai amat ulih ngempitka agi kaul sesama diri,” ku iya ke bisi ngatur rumah tebuka nyerumba Hari Krismas.
Setuju enggau penemu Dumih, pengajar Larry Silas mega madahka Hari Krismas taun tu peluang ke manah endur ngerapitka kaul enggau bala kaban.
Iya madahka gempuru nengah rumah tebuka nya mega meri peluang ngagai bala pengajar bekunsi penemu enggau peneleba bekaul enggau pemansang sekula.
“Maya ke betemu tu meh peluang endur berandauka pasal pengawa ba sekula, pemansang enggau pemujur pelajar bala anak sereta ulih bekelala semak agi enggau bala sebilik enggau bakih ke sama ngajar.
“Pengerami baka Hari Krismas mega peluang endur bebuti tauka betundi enggau pangan diri seraya ti belelak enggau pangan diri,” ku Larry ke ngajar ba sekula ke sama.
Kelimpah ari nya pengajar Raman Dagang ke sama bisi mai sida sebilik ngabang rumah tebuka madahka penger- indu ati ulih bekelala enggau bala pangan ke bukai lebih agi pengajar ke ukai sama sekula endur ngajar.
“Pengerami Hari Krismas tu meh peluang endur bejalai ngagai rumah bala bakih bala kaban ke sama diau di mengeri.
“Laban enti maya pengerami bukai baka Hari Gawai Dayak, endang pulai ke menua tauka rumah panjai,” ku iya ti ngajar ba SK Tanjung Latap, Sibu.