Ahmad Ibrahim agi dichiri nyadi Ketuai PBB Batu Kawa

KUCHING: Datuk Ahmad Ibrahim dipilih baru nyadi Ketuai pampang Parti Pesaka Bumiputera Bersatu (PBB) Batu Kawa ke penggal 2017/ 2020.

Iya dipilih baru, bedau lama tu tadi pengudah menang undi ke pangku pengawa nya di Aum Besai pampang PBB Batu Kawa, teulihka mayuh agi undi ari orang ke betangkup enggau iya, Nerawi Salleh, eng- gau undi 39-2 (majoriti 37 undi).

“Aku meri terima kasih ngagai semua deligit ke bisi datai laban agi arapka aku nguluka baris pampang tu ke penggal 2017/2020.

“Aku ngarapka sukung sereta kerejasama tiap iku kita ba bejalaika tanggung pengawa ke parti lalu negapka parti ( PBB) tu,” ku iya.

Ba pangku pengawa nyadi Sapit Ketuai Pampang dipangku ulih Putit Omar, lebuh iya menang enggau 39 undi, ngalahka Stanley Repon Maxwell, ke semina bulih dua undi aja.

Ba pangku pengawa nyadi mandal Ketuai pampang, dipangku ulih Abu Bakar Baki, lebuh iya mega menang teulihka 39 undi, sereta ngalahka Mohd Hamzah Kadir ke semina nerima dua undi aja.

Ari sepiak sida ke indu, Fatimah Hariah Osman, menang darat lebuh minta pilih nyadi Ketuai Indu pampang PBB Batu Kawa.

Sama bisi enggau ngulu aum nya, Menteri Muda di Opis Kepala Menteri (Pekara bekait enggau Korporat) Abdullah Saidol, ADUN Batu Kitang Lo Khere Chiang sereta Sekretari Politik di Opis Kepala Menteri, Tan Kai enggau Samat Ghani.