Kunteriktor patut ngereja projek diri empu dikena nentuka kualiti
KUCHING: Kunteriktor ke udah dipilih bejalaika projek patut ngereja projek nya ke diri empu, dikena ngenukuka projek nya bekualiti sereta meri penguntung ngagai rayat.
Chairman Majlis Perbandaran Padawan (MPP) Lo Khere Chiang madahka, kunteriktor ke meri kontrak tauka subkunterik ngagai orang bukai ulih ngeruga kualiti projek.
Berindik ari pekara nya iya ngarapka 26 kunteriktor ke udah dipilih MPP bejalaika projek servis meresi parit, nebas rumput enggau nyapu ba kandang endur dikuasa ungkup taun 2018, enda meri projek nya ngagai orang bukai.
“Kami (MPP) deka terit dalam pekara tu iya nya enda ngemendarka tauka nadai subkontrak tang kunterik- tor ke udah dipilih tu patut bejalaika projek servis nya ke diri empu.
“Nya alai sehari tu MPP iya nya opis kaunsil ti keterubah ngatur pengerami tauka pengawa baka tu ungkup kunteriktor ke mujur dipilih bejalaika projek servis.
“Tuju kami ngatur tu laban dikena ngenukuka kitai (MPP) ulih nyendiaka servis ti pemadu manah, iya nya serbis ti disediaka kunteriktor,”ku iya.
Lo ke mega Kaban Kunsil Nengeri (ADUN) Batu Kitang mansutka pekara nya lebuh bejaku seraya ngelalau kunteriktor ba Majlis Angkat Sumpah dan Menandatangani Akuan Pembida Yang Berjaya/Statutory Declaration ke diatur ba MPP ditu, kemari.
Syarat tauka peminta kaunsil ngagai kunteriktor ke dipilih bejalaika projek servis iya nya patut nyain Statutory Declaration ti enda ngemen- darka meri tauka subkontrak projek nya ngagai orang bukai lebih agi projek ti begunaka pemendar ari kaunsil.
Kunteriktor ke mujur dipilih patut ngengkahka nama supervisor sereta lumur telefon ba tiap projek ke dipejalaika dikena ngemuntangka mensia mayuh ngenataika sebana nyema bisi penanggul, kelimpah ari kunteriktor patut nganjung Traffic Safety Management Plan dikena nentuka pengelikun pengereja pengawa enggau mensia mayuh maya projek nya benung dipejalaika.
Iya madahka MPP deka terit agi udah tu berindik ari selalu nerima sebana dipadahka enda bejalaika projek enggau manah sereta betangguh.
Nitihku Lo, kunteriktor ke dipilih MPP nya nengah proses ti terit ba tinda ke alai tiap kunteriktor ti minta projek enda tau enda bisi referen ari ejensi bukai tauka Opis Kereja Raya (JKR) nyengkaum opis kaunsil bukai.
Ku iya nya dikena ngenukuka kunteriktor nya amat ulih bejalaika projek ke diberi.
“Kunteriktor ke ditemu enda nitihka atur ke ditetapka lebih agi meri tauka subkontrak projek servis tu ngagai orang tauka kunteriktor bukai deka diketuka kontrak. Lalu udah nya dalam timpuh dua taun enda diberi peluang nerima projek.
“Nambahka nya kunteriktor ke enda bejalaika projek enggau manah mega deka diketuka sereta nama kunteriktor deka dipasukka dalam sistem ‘blacklist’ MPP enggau Opis Menteri Kaunsil Kandang Menua enggau Pengawa Berumah,” ku iya.
Sama bisi datai ngulu pengerami nya kemari, Sapit Chairman MPP Datuk Ahmad Ibrahim sereta raban kaunsilor MPP ke bukai.