Pemansang pelajar anak meseti dikemeratka bala apai indai

SAMARAHAN: Pemansang ba pekara pelajar meseti dikemerat, ku Kaban Parlimen (MP) Kota Samarahan Rubiah Wang.

Iya madah semina nengah pemandai, komuniti kelebih agi ruang bilik ulih ngangkatka sosio ekonomi.

“Pemansang ba pekara pelajar ulih ngangkatka sosio ekonomi kelebih agi ngagai peranak ke diau di menua pesisir.

“Ketegal nya, kitai meseti meratka pekara pelajar bala anak,”ku iya ba Program Ceria Kembali ke Sekolah di Dewan Suarah Samarahan kemari.

Program kemari diatur Felcra Berhad Kandang Sarawak lalu nyadi sebengkah program tanggungpengawa korporat( CSR) Felcra.

Ba program nya, 134 iku nembiak Felcra nerima bantu kereban sekula ari Felcra ke disua Rubiah.

Ngenang sentang program nya, Rubiah madah Felcra udah mantu ba program pemansang tanah lalu diatu bela ngemansang pekara pelajar anak kaban Felcra.

“Pengawa Felcra chukup berat ba atur ngemansang tanah di menua pesisir ngelama ke udah.

“Diatu Felcra bisi program kedua iya nya mai pemisi belanja ngagai penyereta Felcra ke tebal agi peranak ke nguan menua pesisir,” ku iya.

Rubiah nambah Felcra udah ngatur mayuh program di Samarahan ke alai penyereta Felcra diatu udah majak nambah lalu tanah pan udah mayuh dikemansang.

“Sehari tu kitai ngadu program Ceria Kembali ke Sekolah ungkup pemaik anak kaban Felcra,”ku iya.

Bela datai Pemesai Pelilih Samarahan Mohamad Ainie, Pemesai (Menijar) Felcra Sarawak Mohd Jamil Mohd Hanifah enggau penyereta Felcra.