Perintah nengeri ngemeratka pengelantang semua bansa enda ngira jalai pengarap
MUKAH: Pengawa numbuhka Hal Ehwal AgamaAgama Lain ( UNIFOR) dipejalaika perintah nengeri nyengala ngayanka pengelantang begulai taja enda sebaka jalai pengarap enggau bansa ti dikemeran di nengeri tu.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah madahka pekara ngintu pengelantang enggau pemerat pengarap bukai seruran diperatika.
“Nengah penumbuh UNIFOR di baruh pegai Opis Kepala Menteri, iya deka seruran nentuka pengelantang enggau pemerat semua bansa di nengeri tu deka diintu lalu enda ditejuka pia aja,” ku iya rambau Program Sarawak Celebrate beserimbai enggau Krismas di Kampung Sungai Ud, Dalat kemari.
Kelimpah ari nya, tu mega nyata ngayanka perintah Sarawak endang ngemeratka pemereti ati enggau bebasaka hak sereta penyebela antara pupu bansa enggau jalai pengarap di nengeri tu.
“Enam juta (RM) mega udah diagih ngagai perintah nengeri ungkup UNIFOR dikena mantu gempung pengarap enggau pengawa ngatur sekalika ngaga baru tauka ngemanahka rumah sembiang,” ku iya nerang.
Kemari, iya mega bisi madah udah nyuaka chek sepenyampau RM180,000 dikena ngaga baru Chapel Saint Plechelmus, Kampung Tanam, Dalat diambi ari agih belanja UNIFOR nya.
Nya kebuah, iya nyemetak madah serakup enggau pengelantang ti udah ditampung kenyau ari kelia endang patut ditanka bala komuniti.
Bebasaka bansa bukai enggau jalai pengarao sida mega, enda malut diri ba pengawa tauka bejakuka penemu pasal sensitiviti bansa sereta jalai pengarap bukai.
Program ke bansa tu mega ku iya nyadi agih khas ari perintah nengeri dikena ngintu semua hari besai ke diintu di nengeri tu.
Pengerami Krismas sekali tu diatur begulai tiga gerija di Dalat iaitu Roman Katolik, Sidang Injil Borneo (SIB) enggau Methodist.
Nengah penumbuh UNIFOR di baruh pegai Opis Kepala Menteri, iya deka seruran nentuka pengelantang enggau pemerat semua bansa di nengeri tu deka diintu lalu enda ditejuka pia aja. Dato Sri Fatimah Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang