Anang irau pasal telu ke dijual di Pasaraya Emart Matang

KUCHING: Mensia mayuh kelebih agi penguna enggau pemeli ba Pasaraya Emart di Matang enda patut irau pasal telu ke dijual ba palan bebeli barang nya.

E k s e k u t i f K a n a n Pasaraya Emart Matang, Loh Wei Teck madahka palan bebeli barang nya enda kala nyual telu ke ditempa tauka telu tiru baka ti dikerembaika dalam media rama.

Ku iya, piak Opis Menteri Dagang Nengeri, Koperasi enggau Pekara Bebeli Barang (KPDNKK) udah ngesahka iya nya premis tu enda nyual telu tiru asil ari pengawa meresa premis ti dipejalaika kena 26 Disember tu tadi.

“Kami enda tentu lantang ati enggau ulah pengempu akaun Facebook atas nama Somba Mix ke udah ngerembaika berita bula pasal nyual telu pelesu ba palan bebeli barang tu.

“Pekara tu udah ngenyaika nama Emart ba mata mensia mayuh lebih agi penguna enggau pemeli tetap kami ba mengeri tu.

“Kami enda nemu nama tuju orang nya ngaga pekara baka nya, tang kami enda diau diri ari mengambil tindakan undang-undang ngagai orang tu,” ku iya ba aum pengarang berita ba Opis Pengurusan Emart di Matang, kemari.

Ku Loh, berindik ari pekara nya seiti riput polis digaga ba Balai Polis Batu Kawa kena 26 Disember tu tadi ngambika atur ke patut diterima pengempu akaun Facebook nya.

Riput ku iya mega bisi digaga ngagai Suruhanjaya Komunikasi dan Multimedia Malaysia (MCMC) ba hari ke sama riput polis digaga.

Loh mega nerangka semua bekal telu ke dijual ba palan bebeli barang tu diambi ari pemekal ke ngembuan lisin ti sah.

Berindik ari nya piak pengatur ngelalau mensia mayuh lebih agi penguna enggau pemeli Emar ngambika enda arapka berita bula nya.

Loh mega nyamin telu ti dijual ba Emart iya nya telu asal ke diambi ari pemekal ti sah.

Berebak enggau tu iya madahka, palan bebeli barang tu deka bejual chara besai ujung taun kena 31 Disember 2017 enggau 1 Januari 2018 tu.

Loh ngarapka pemeli terus arapka palan bebali brang sereta enda ngelepaska peluang bebeli mayuh macham barang ke dijual ngena rega pemadu baruh dua hari berunggu nya.