Program Krismas diatur ACS pelasar ngerapitka kaul pupu bansa
SIBU: Pengawa ngintu Krismas ke diatur Serakup GerijaGerija Sarawak (ACS) Pampang Sibu udah nyadi pelasar beguna endar ngerapitka kaul pupu bansa sereta nerenakka penyerakup menua.
Kaban Kunsil Nengeri ( ADUN) Dudong, Datuk Tiong Thai King madah, iya berasai temegah laban semua orang udah bebendar gawa ngemujurka pengawa ngintu Krismas ngambika lanchar.
“Pengawa tu endang meri pemaik besai endar ngagai Sarawak, ti tampak nyadi nengeri diteladan ba pemaik enggau penyerakup dalam pengelain.
“Pekara tu pemadu iya engkeman dikena nyamin penegap enggau pemansang menua ari sukut politik, ekonomi enggau rama laban begempung kitai mansang,” ku iya lebuhka bejaku ba Ngintu Krismas 2017 di Dataran Bandar Sibu.
Pengawa Ngintu Krismas 2017 diatur ACS Sibu berengkah kena 2 ngagai 26 Disember di Dataran Bandar Sibu enggau Koridor Chuan, berambaika jaku ‘ Hadiah Yang Teragung’.
Sama bisi datai Chairman Rancangan Sibu 1 ( RS1) Datuk Andrew Wong, Chairman ACS Sibu ken lalu nyadi chairman pengatur, Pastor Ting Leh Na, chairman Taun Nemuai Ke Sibu 2017 Kaunsilor Wong Hie Ping sereta bala bukai.
Nitih ku Tiong, Krismas tu endang sebengkah pengerami ti universal, diintu di serata dunya.
“Iya mega siti pengerami ti ngemai pengaga, pengelantang, kelimpah ari pemaik,” ku Chairman Kaunsil Mengeri Sibu (MPS) nya.
Tiong mega madahka, pengawa ngatur pengerami ngintu Krismas 2017 ari ACS Sibu tu mega udah mantu ngemujurka Taun Nemuai Ke Sibu 2017.
Iya mega meri terima kasih ngagai bala Komiti Pengatur, kaban gerija sereta sida ti melanja, ke udah gawa ba atur ngemujurka pengerami tu.