Tanggungpengawa DPM II ukai semina ulih ngemata Sarawak enggau Sabah tang mega ngemata pemansang menua pesisir
KUCHING: Buah penemu nempa siti agi pangku pengawa Sapit Menteri Besai ( DPM) manah lalu deka nentuka pemansang dalam kandang mengeri enggau menua pesisir dikerembai manah, ku pemerati pekara politik Professor Dr Jeniri Amit.
Ku iya, tanggungpengawa DPM II ukai semina ulih ngemata Sarawak enggau Sabah tang mega ngemata pekara pemansang menua pesisir di serata menua.
Jeniri nambah Perintah Besai patut nunda Sarawak ti bisi tiga iku Sapit Kepala Menteri.
“Aku setuju enggau perambu nempa siti agi pangku pengawa sapit menteri besai ti ukai semina ngemata Sarawak enggau Sabah tang ngemata pekara pemansang dalam kandang mengeri enggau menua pesisir di serata menua,”ku Jeniri madah ngagai The Borneo Post kemari.
Iya nambah pangku pengawa DPM II diterima semua parti dalam gempung BN kelebih agi PBB ti ngembuan sukung pemadu tegap ari peranak Sarawak.
Aku setuju enggau perambu nempa siti agi pangku pengawa sapit menteri besai ti ukai semina ngemata Sarawak enggau Sabah tang ngemata pekara pemansang dalam kandang mengeri enggau menua pesisir di serata menua. Professor Dr Jeniri Amit Pemerati Pekara Politik
“Perambu nempa pangku pengawa DPM II meseti disetuju semua parti dalam gempung BN.
“Enti semua setuju, nya mandangka UMNO lurus ba konsep bekunsi kuasa lalu diterima kededua Sarawak enggau Sabah ti dekaka kuasa otonomi ari Kuala Lumpur,”ku Jeniri.
Nyadi nengeri ‘fixed deposit’, tu meh maya Perintah Besai ke dikuasa UMNO ngakun Sarawak ke nyadi kaling kunsi merintah menua.
“Sarawak seruran mantu Perintah Besai ba tetiap pengawa bepilih. Ketegal nya tu mih maya Perintah Besai nempa seiti agi pangku pengawa sapit menteri besai ungkup Sarawak,”ku Jeniri nandu.
Jeniri mansutka penemu nya nimbal jaku Chairman Parti Pesaka Bumiputera Bersatu (PBB) pampang Batu Kawa Datuk Ahmad Ibrahim ti minta siti agi pangku pengawa DPM lalu dipangku ketuai ukai ari UMNO, tang patut ketuai ari Sarawak tauka Sabah.
Ahmad madah pampang Batu Kawa ngarap BN berundingka perambu nempa seiti tauka dua pangku pengawa DPM ungkup ketuai ke ukai ari kaban UMNO.
“Siku ari DPM tu meseti ketuai ari Sarawak,”ku Ah- mad lebuh dikerandau The Borneo Post Hari Empat tu tadi.
Iya mega madah PBB patut diberi pangku pengawa DPM ketegal PBB ba penuduk lumur dua pemadu mayuh kaban parlimen pengudah UMNO.
Rambau Aum Deligit Tiga Taun Sekali(TGM) kena 24 Disember tu tadi, Ahmad sekali agi dichiri nyadi chairman PBB pampang Batu Kawa pengudah ngalahka Nerawi Salleh. Ahmad bulih 39 undi lalu Nerawi bulih dua.