ISIS: Rayat Malaysia ke ditangkap ba Karachi dikearap ulih dibai pulai
TEBEDU: Nembiak ari Sarawak, Al Muhd Alfie Kqhyriel, 20 ke ditangkap di Karachi, Pakistan diatu agi baruh kes polis entarabansa (Interpol).
Sapit Menteri Besai Datuk Seri Ahmad Zahid Hamidi madah piak Polis Diraja Malaysia (PDRM) bekerejasama enggau Interpol ngulihka pemadahka ke silik agi pasal rayat Malaysia ke ditangkap di menua Pakistan nya.
“Nengah MLA (Mutual Legal Assitance) enggau menua Pakistan, kami minta ngambika OKT (Orang kena Tahan) nya ulih dibai pulai ngagai menua asal iya (Malaysia, ngambika iya ulih dipansik nitihka sukut undangundang sereta pegelikun di Malaysia.
“Lalu nangkan nya, iya ulih di bechara sereta diukum kort di Malaysia.
“Kami meri besai terima kasih ngagai raban pengelikun Pakistan ke udah madah pasal rayat Malaysia ke kena tan di menua nya.
“Kami enda belembut, lebih agi rayat Malaysia ke ditemu mai senjata enggau chara belalai,” ku Ahmad Zahid.
Iya madah munyi nya lebuh dikerandau ba aum media, pengudah bechairmanka aum media lebuh nemuai ngagai CIQS (Custom, Immigration, Quarantine Sarawa) Tebedu, ensanus.
Ahmad Zahid ti mega nyadi Menteri Dalam Menua (KDN) madahka penusah ke nyadi nya, diperatika senjata sereta perengka guna senjata dibai ngagai menua ketiga ukai pengawa ke patut dipetatika ulih raban pengelikun menua tu.
“Nya alai, Malaysia ngarapka nembiak nya ulih dibai pulai ari Karachi ngagai Malaysia,” ku iya.
Muhd Alfie ditangkap di Padang Bilun Entarabansa Jinnah di Karachi, lebuh iya deka nepan bilun ‘Thai Airways’ngena penerebai TG342 nuju Bangkok, Thailand. .
Iya dipadah Opis Penguasa Pakistan ngerampas empat (4) pistol, lapan (8) majalah pasal (seterum) enggau 70 peluru ke di tapuk iya dalam beg sereta kasut.
Muhd Alfie mega dipelabaka bisi enggau kaul ISIS (Islamic State).
Sama bisi ngulu aum media nya, Kepala Menteri Datuk Patinggi Abang Johari Tun Openg, Menteri Penguasa Pengereja Pengawa Dato Sri Richard Riot anak Jaem, Sapit Menteri Dalam Menua, Datuk Nur Jazlan Mohamed, Direktor Opis Imigresen Malaysia, Datuk Seri Mustaffar Ali enggau Kepala Polis Sarawak, Datuk Amir Awal.