Anang jampat leju nyeridi anak
SRI AMAN: Anang jampat leju nyeridi bala anak, pia ku lalau Menteri Pemansang Indu, Ruang Bilik enggau Komuniti, Datuk Seri Rohani Abdul Karim.
Nitih ku iya, apai indai patut chakah ba pengawa nya lalu ngaul diri ba pemansang bala anak sekalika ba sukut pekara pelajar tauka rama.
“Pekara tu beguna endar laban apai indai patut nemu sapa bagi enggau bala anak sida bebakih sereta sekalika anak sida orang ti manah ulah tauka enda,” ku iya.
“Enti sema bala anak kitai salah pilih bakih, tu deka ngemai pangka enda manah ngagai sida (bala anak), lalu tu deka mai mayuh penanggul, kelebih agi ba ulah sida,” ku iya nambah.
Rohani ke mega Kaban Parlimen ( MP) Batang Lupar mansutka jaku nya lebuh bejadika Pengawa Nyuaka Bantu Kantung Sekula 2018 ungkup Parlimen Batang Lupar bepalan di Sekula Primari (SK) Lela Pahlawan, Lingga semak ditu, apin lama ke udah.
Berindik ari nya ku iya, apai indai patut matau pejalai bala anak kelebih agi pengudah jam sekula.
“Anang sesekali meri dalih nadai ulih ngelimpangka awak diri nitihka pejalai bala anak, ketegal kelalu kiruh enggau pengawa di opis tauka ke bukai,” ku iya.
“Taja pia, apai indai patut ngelimpangka awak diri begulai enggau bala anak, abis nadai nanya pasal pelajar sida enggau ke bukai.”
Ku Rohani, ulah kiruhka bala anak tu ulih ngasuh sida ngasaika diri dikeibuh sereta dikesayau diri sebilik.
“Enti kitai nyadi apai indai enda nerenakka ulah ke bansa tu ba diri empu, tentu tu deka nyadi pun bala anak ngaul diri enggau aktiviti enda menuku baka ngereja penyalah enggau ke bukai,” ku iya.
“Bala anak deka ngasaika diri enda dikeibuh sida sebilik nyema apai indai enda kala kiruhka pekara pasal sida,” ku iya nambah.
Sama bisi datai Sekretari Politik Rohani, Saifuidin Matsah, pengari Residen Bagi Menua Sri Aman, Abang Muhammad Syafiq Abang Moktar, Kepala Pengajar SK Lela Pahlawan, Ahmad Ibrahim, Mandal Ketuai Pampang PBB Pampang Lingga, Kunjang Nanang, Penghulu Jamari Edi sereta bala bukai.
Berebak enggau nya, bisi 100 iku nembiak ari SK Lela Pahlawan Lingga, Sekula Primari Bansa ( SJK) Chung Hua Lingga enggau SK Saint Dunstant, Seduku Lingga udah nerima pemeri bantu kantung sekula.