Komuniti di Long Semadoh enggau Ba’Kelalan udah bisi jalai menyana
KUCHING: Penguna jalai alun enggau sida ti mai perengka pengangkut di Jalai Ba’Kelalan nerima pemeri Krismas tumu beberapa hari enggau penembu pengawa ngemanahka Jalai Long Luping-Long Semadoh-Ba Kelalan, 66 km pemanjai.
Nitih ku siku ti mai perengka pengangkut, Lion King @ Singa, penembu renggat keterubah ba pengawa ngangkatmanahka jalai nyadi pemeri Krismas pemadu manah ti diterima peranak dia taun tu.
“Tu pemeri Krismas pemadu manah taun tu ngagai semua komuniti di Long Semadoh enggau Ba’Kelalan, kitai bisi jalai jauh manah diatu. Kitai udah minta jalai ti meruan ngelama tu lalu diatu peminta kitai nyadi nyata.
“Aku deka meri terima kasih ngagai The Borneo Post ti udah mantaika peminta kami lalu ngagai perintah ti udah datai mantu,” ku Singa madah ngagai The Borneo Post kemari.
Ku iya, pengudah jalai nya dikemanah enggau meruan, raban kunteriktor deka melakin ngambika ulih ditengah maya hari ujan.
Siku agi mai perengka pengangkut, Purait Gatum ari Buduk Nur, Ba’Kelalan, jalai nya diatu jauh manah dibanding beberapa bulan ke udah.
“Diatu, kerita ulih nengah jalai nya napatka genturung pendiau kelebih agi sida ke ngintu Krismas. Rayat berasai lantang meda pemanah pengawa digaga kami lalu tu dikedeka kami,” ku Purait.
Ku iya, sekeda jalai agi patut dikemanah tang andal amat jalai nya deka tembu enda lama da agi.
“Berindik ari agi musim pengujan, kami enda ibuh ba sekeda pengelaun pengawa laban kami pechayaka kunteriktor deka ngemanahka ungkup kami,” ku Purait.
Ba penemu Singa Sakai, iya meri terima kasih ngagai The Borneo Post enggau raban bekuasa bekaul ti udah datai mantu sida.
Lebuhka dirandau, Sekretari Mendam Opis Menteri Pemansang Infrastruktur enggau Perengka Pengangkut, Datu Safri Zainuddin madahka belanja pengawa ngangkatmanahka Jalai Long Luping-Ba Kelalan, 75 km pemanjai, deka manggai RM45 juta.
Jalai nya, ke dulu suba jalai batang udah diangkatmanah di baruh Program Jiwa Murni raban Soldadu lalu tembu dalam taun 2013.
Taja pia, ketegal gaya hari, kelalu sarat enggau enda diintu enggau meruan, ngujungka gaya jalai rusak, ngujungka peranak menua nya kelebih agi sida ti ngemai perengka pengangkut nganjung pesan minta bantu ngagai perintah, isu ti dikeluarka the Borneo Post.