MPP deka minta agih belanja ari KPKT dikena ngemanah 24 rumah udah buruk
KUCHING: Opis Kunsil Sitak Padawan (MPP) ba taun 2018 deka ngenataika pinta agih belanja dikena ngemanah 24 iti rumah ti udah buruk.
Chairman iya, IIr. Lo Khere Chiang madah pinta nya deka dikenatai ngagai Opis Menteri Pengelantang Mengeri, Berumah enggau Opis Kunsil ( KPKT) nengah Program Bantu Ngemanah Rumah Buruk dikena mantu ruang bilik seranta dalam program e-kasih.
“Aku ngarap pinta kitai nya dikemendar lalu MPP ulih mantu 24 ruang bilik ti begunaka bantu ngemanah rumah,’ku iya.
Lo mansutka jaku nya lebuh dikerandau pemberita rambau ngulu pengawa nyuaka Projek Tembu: Ngemanah Rumah Buruk ngagai tiga iku penerima di Skim Pengentap Pendiau Desa Wira ditu, kemari.
Iya nambah, agih belanja RM15,000 diungkupka ngagai tetiap rumah lalu nya dikena meli perengka rumah baka ke atap, dinding sereta ke bukai.
“Maksima RM15,000 ngagai tetiap rumah lalu deka dipelanja ba pengawa ngemanah rumah aja,’ku iya.
Lo ke mega Kaban Kunsil Nengeri( ADUN) Batu Kitang netapka bantu nya semina ungkup orang tauka ruang bilik ti udah ngerijista diri ba e-kasih.
Berindik enggau nya iya meransang ruang bilik ti ba ikas seranta ngerijista diri dalam program e-kasih ngambika bela ampit bantu.
Ngenang kaul ke sama, Lo ngarap 28 opis kunsil di serata Sarawak ulih ngenataika pinta ke sama ngagai KPKT.
Ku iya, pekara nya berat ngambika rayat seranta ti udah ngerijista ba e-kasih tau bulih pemaik ari program bantu kelebih agi bantu ngemanah rumah.
“Di Sarawak kitai bisi 28 opis kunsil iya nya nyengkaum Bandaraya nyentuk ngagai majlis(opis kunsil).
“Enti 28 iti opis kunsil tu ngenataika pinta lalu diberi agih belanja mantu 23 ruang bilik tetiap taun, kitai ulih meri bantu ngagai 644 ruang bilik.
“Rayat ke seranta tau ngenataika diri ngagai opis pelilih menua lalu ngerijista diri ba program e-kasih,’ku iya.