Penyampau kompaun dirikod KPDNKK Sarawak taun tu niki
KUCHING: Penyampaukompaun ti dirikodka Opis Menteri Dagang Dalam Nengeri, Gerempung Kerejasama enggau Pekara Bebeli Barang (KPDNKK) Nengeri Sarawak taun tu niki enti dibandingka enggau taun 2016.
Sapit Direktor KPDNKK Sarawak, Abd Hafidz Abd Rahim madahka kompaun ti dikeluarka nya ketegal mayuh macham penyalah ke ngelanggar atur tauka undang-undang opis menteri nya.
“Dalam taun 2017 kami (KPDNKK Sarawak) udah ngerikutka penyampau kompaun iya nya RM125,950.00, lalu penyampau nya bisi nambah enti dibandingka enggau taun 2016 ti ngerikutka RM81,500.00.
“Kompaun ke dikeluarka tu ketegal ngelanggar atur tauka ngereja penyalah di baruh akta ke dipejalai tauka diteritka KPDNKK,” ku iya.
Taja pia ku Hafidz ti mega nyadi Ketua Penguatkuasa KPDNKK madahka, pen- yampau barang ke dirampas taun tu bisi nurun dibandingka enggau taun nyin kemari.
Nitihku iya penyampau kompaun sereta barang ke dirampas nya asil ari pengawa meresa premis tauka kedai sereta chara bukai ti dipejalaika di serata nengeri tu.
iya madahka pengawa meresa premis tauka kedai di mengeri enggau menua pesisir deka chakah dipejalaika taun baru dikena nyaga hak penguna.
“Lalu penyampau rega barang ke dirampas taun tu bisi kusut iya nya RM2,132,680.85 enti dibandingka enggau taun 2016 RM23,026,006.63.
“Kompaun ke dikeluarka nya sereta barang ke dirampas nya asil ari pengawa meresa kedai tauka premis tiap hari, sebana sereta operasi ke dipejalaika KPDNKK Sarawak.
“Di serata Sarawak taun tu kami udah mujur meresa 67,776 premis lalu ba taun 2018 juluk kami deka nambah tauka ngenyakahka agi pengawa meresa premis di mengeri enggau menua pesisir. Taun 2016 bisi 79,360 premis diperesa,” ku iya.
Berebak enggau tu lebuh ti ngenang atur pengawa matau orang dagang di nengeri tu, iya madahka piak iya bejalaika mayuh atur tauka program ti mungkur raban bansa.
Ku iya, KPDNKK meri penerang tauka pelajar ngagai orang dagang sekalika nengah licha tauka seminar ngambika bejalaika pengawa dagang nitihka etika.
“Kami mega bisi nganjung pengawai kami ba kaunter servis penguna ba pasar besai sereta nganjung pegawai ba palan dagang besai sereta kompleks bebeli barang kelimpah ari meresa premis.
“Nambahka nya kami meransang raban bansa nyereta Friends of KPDNKK (FOK) awakka ulih ngenataika penerang bekaul enggau chara orang dagang bedagang enggau ke bukai,” ku iya.
Kelimpah ari nya, bekaul enggau barang ke dijaga perintah nengah Skim Kawalan Harga Musim Perayaan Krismas 2017, iya madahka, pengawa pematau dipejalaika tiap hari sereta orang dagang nitihka atur ke ditetapka perintah.
Entara barang ke dijaga perintah nyerumba pengerami hari Krismas iya nya manuk idup; manuk standard; manuk super; manuk tuai idup; manuk belanda import; sayap manuk (rega maksimum di Sabah, Sarawak enggau Labuan); telu manuk gred A, B, C; babi idup, dagin babi (perut); dagin jani (dagin enggau gemu) sereta ke bukai.
“Pengawa pematau dipejalaika tiap hari sereta orang dagang nitihka rega maksimum ti ditetapka perintah. Kami ke bejalaika tu laban deka ngajar orang dagang ti nyual barang dijaga perintah nitihka atur ke udah ditetapka.
“Lalu asil ari pengawa pematau, orang dagang meri kerejasama ti manah,” ku iya.