CNS nyukung penuh penemuti deka mansik baru elawin
KUCHING: Kongres Serakup Pengereja Pengawa Opis Perintah ( CUEPACS) Nengeri Sarawak ( CNS) nyukung penuh penemu CUEPACS ti deka berati tauka mansik baru bekaul enggau elawin orang ke gawa opis perintah di Sarawak.
Chairman CNS Ahmad Malie madahka nya ngayanka CUEPACS enda ngalahka diri taja pan perambu bekaul pekara nya kala udah dikenataika perintah sebedau tu.
Sebedau tu ku iya, CUEPACS udah bejalaika pansik sereta meri perambu ngagai perintah ngambika ulih diperundingka dalam Bajet 2018 tang perambu nya bedau ulih diperundingka perintah.
“CNS nyukung penuh pengeran sereta penerang ke dibantaika Datuk Azih Muda, Presiden CUEPACS ti deka berati tauka bejalaika pansik baru bekaul enggau elawin ti mungkur orang ke gawa ba opis perintah di Sarawak lebih agi elawin wilayah (B.I.W), elawin rumah (I.T.P) enggau elawin ke bukai,” ku iya lebuh ditanya Utusan Borneo bekaul pekara nya.
Ku iya, CUEPACS benung bebendar ngemanahka keretas perambu ti bekaul enggau nya dalam siti bengkel ke diatur 15 ngagai 17 Januari tu di Sandakan, Sabah.
Pengudah keretas perambu nya tembu sereta tegap penerang, CUEPACS deka ngenataika baru keretas perambu nya ngagai perintah ngambika ulih diperundingka, ku iya.
“Tu ngayanka CUEPACS deka seruran ngemeratka pengelantang pendiau orang ke gawa ba opis perintah dalam.
“Seagi bedau bulih insentif ti setipak baka ke dipinta sereta dikemeratka, seagi nya meh CUEPACS deka bebendar ngemeratka pengelantang pendiau orang ke gawa ba opis perintah,” ku iya ti mega Presiden Gerempung Pengajar Bumiputera Sarawak (KGBS).
Nyadi sebengkah organisasyen dibaruh CUEPACS Kebangsaan ku Ahmad, CNS meri sukung tegap dikena nentuka semua nya ulih nyadi nyata dudi hari ila.
Apin lama, 26 Disember tu tadi Presiden CUEPACS DatukAzih Muda madahka CUEPACS deka mansik baru penyampau elawin ke udah bisi ungkup orang ke gawa ba opis perintah nyengkaum Semenanjung, sabah enggau Sarawak ti dipelabaka berengkah Januari 2018.
Iya madahka pengawa berati tauma mansik baru nya dikena ngenukuka pengelantang urung 1.6 jutra iku orang ke gawa ba opis perintah di menua tu.
Ku Azid, fasa kedua CUEPACS begukai enggau Jabatan Perkhidmatan Awam (JPA) deka mansik baru semua pekeliling ke udah lama, berengkah taun baru.