PPS andalka perintah bisi nyediaka geran ungkup orang gawa ke tasik
SIBU: Gerempung Orang Gawa Ke Tasik Sarawak (PPS) andal perintah nengeri enggau perintah besai ngungkupka geran ngagai orang gawa ke tasik nangkan ke tu ila.
Presiden PPS Zahidin Dor madah, taja orang gawa ke tasik begaji besai tang ke bendar iya sida napi mayuh penguji lebih agi ba pekara belanja ti besai maya ngambi kus.
“Maya hari tu, sebedau ulih gawa ke tasik, sida meseti ngambi kus dulu.
“Bayar ngambi kus bangat mar lalu bisi mega enda mujur gawa ke tasik laban suntuk belanja dikena mayar kus.
“Taja Yayasan Sarawak bisi nyediaka bantu ba Kus Rating nyentuk WKE/WKO tang kus modular agi mar,” pia ku iya madah maya ngulu pengerami makai lemai ke diatur PPS enggau Koperasi Orang Gawa Ke Tasik Berhad (KPSB), empai lama tu tadi.
Temuai ke dipebasa maya pengerami tu iya nya Sekretari Politik Kepala Menteri ti mega Penyanding Penemu PPS Julani Mokhtar kelimpah bela digulu Sapit Presiden PPS Raduan Serap.
Bekaul enggau penumbuh PPS, Zahidin madahka gerempung nya beguna bendar dikena ngintu pengelikun orang gawa ke tasik.
“PPS mega nyadika plat- form alai sida gawa ke tasik mantaika penemu diri.
“Nambahka nya, diatu agi mengkang mayuh penanggul bisi nyadi ba industri kapal lalu meseti diputarka enggau manah ngambika orang menua bukai enda kelalu beambi ulih ba pengawa gawa ke tasik,” ku iya madah baru.
Ketegal nya, ku iya, PPS deka naka alah ngetanka pengelikun hak orang gawa ke tasik ari menua tu.
Dulu agi ari tu, Julani ba jaku iya minta PPS enggau KPSB begempung penemu ba tuju ke sebaka iya nya ngintu pengelikun orang gawa ke tasik.
“Nya alai, sida ke bedau nyadi raban gerempung ulih ngerejister nyadi raban ngambi ngeringka agi PPS sebedau mujur bejadi tuju penumbuh gerempung.
“Pia mega ngarapka komiti iya ke diatu mujur begulai lalu ngiga chara nyaup ngintu pengelantang orang gawa ke tasik,” pia ku iya maya nya.
Ba pengerami tu mega, Raduan bisi nerangka International Maritime Labour Convention (MLC) ti benung dipejalaika perintah menua Malaysia.
Iya madah, tuju nya endang dikena perintah menua tu ngintu pengelikun orang gawa ke tasik kelimpah ngira pengelantang sida gawa ba atas kapal.