Tu nyadi pemansut ekonomi keempat nangkan sektor minyak enggau gis, kayu batang sereta sawit
MIRI: Tuju kuing Majlis Bandaraya Miri ( MBM) taun 2018 deka ngerembaika sektor dagang temuai nyadi pemansut ekonomi besai di Miri.
Datuk Bandar Miri, Adam Yii madha, kenyau ari Julai 2016, MBM netapka agenda besai ngemansangka dagang temuai nyadi pemansut ekonomi keempat pengudah minyak enggau gis, kayu batang sereta sawit.
“Kitai berasai asa, laban ketetiga pemansut tu kena pangka ubah ekonomi dunya. Nya kebuah, kitai ngarapka sektor dagang temuai ulih nyungkak pulaika pemaik mengeri besai enggau peranak iya.”
“Senentang pekara tu, pemansang dagang temuai begunaka kaul tetiap iku peranak Miri. Aku ngarapka sida ulih beserakup sereta begulai gawa ngemansangka dagang temuai,” ku iya dalam jaku nyambut penatai Taun Baru 2018.
Ku Adam, batang tuju pengawa ngelancharka Taun Nemuai Ke Miri 2018 – Discover Miri, Uniquely Borneo, dikena mai pemansang dagang temuai ke Miri ngagai siti tikas tinggi agi, ngemeratka pengawa ngangkatmanahka pengurang ti ditapi sebedau tu.
Ku iya, tu nyengkaum ngemai dagang temuai ke baru, ngatur mayuh agi program antarabansa.
“Kitai gaga endar laban kena 12 Disember tu tadi, Miri bisi penerebai lansung ti kedua iya nya ari Miri ngagai Pontianak, enggau dua kali penerebai nengah Xpress Air, Indonesia. Ari penyuah penerebai tetiap hari ngagai Singapore, Miri diatu bisi semilan penerebai lansung antarabansa.”
“Nya alai, beguna endar penerebai tu chakah agi dikelaku. Kitai ngarapka mayuh agi penerebai antarabansa udah tu ila,” ku iya.
Kelimpah ari nya, pekara kedua ti nyadi pemerat MBM taun 2018 iya nya bekaul enggau rampa menua, ngurangka pengawa bekenaka plastik lalu nyilih iya enggau alternatif bukai, ti manahka rampa menua asal.
Iya ngarap ulih bekerejasama enggau sektor ke bisi pemerat ngangkatka Miri nyadi sebuah mengeri besai ti beresi sereta gadung ungkup rebak dudi hari.
Kitai berasai asa, laban ketetiga pemansut tu kena pangka ubah ekonomi dunya. Nya kebuah, kitai ngarapka sektor dagang temuai ulih nyungkak pulaika pemaik mengeri besai enggau peranak iya. Adam Yii Datuk Bandar Miri