Komuniti Dayak patut besedia napi ubah dalam pemansang ekonomi

KUCHING: Raban bansa lebih agi Dayak patut lebih berati sereta beratka ubah pemansang dalam dunya moden enda ngira sekalika dalam pelajar, pengawa rama sereta sosio-ekonomi.

Chairman Raban Pemikir Dayak ( DTTG) Pampang Kuching, Sybestine Gambong madahka raban bansa patut pintar betapi enggau segang pemansang tauka ubah ke nyadi.

“Nya alai nyerumba Taun Baru 2018, DTTG Pampang Kuching ngansak raban bansa ngambika lebih beratika pengerembai pemansang enggau ubah dalam dunya moden awakka enda tinggal enggau ulih besemekih.

“Raban bansa patut lebih pintar betapi enggau ubah ke majak nyadi. Pengibuh raban bansa lebih agi apai indai amat beguna baka berati sereta matau nama utai ke nyadi ba anak ba dunya moden diatu laban anak lebih agi ke raban biak ke mayuh pekara ulih ngeruga senutuk enggau pemansang Teknologi Pemadah,” ku iya seraya ngarika DTTG Pampamg Kuching meri Selamat Taun Baru 2018 ngagai semua pemacha Utusan Borneo.

Berebak enggau tu Sybestine mega meransang raban nembiak taula biak ke nyadi reta nengeri tu patut ngembuan ulah ke ulih bebatak asur sereta ulih besemekih.

“Raban nembiak tauka biak patut lebih beratika ubah enggau pemansang pemadu baru ngambika enda tinggal lebih agi dalam bidang ekonomi.

“Raban nembiak tauka biak patut landik tauka pandai ngiga peluang sereta bisi pengerindu ke dalam dalam semua bidang ku ulih nyungkak ekonomi,” ku iya.

Iya ngarapka raban bansa lebih raban biak jeman baru beratka pemansang baru ngambika ulih setipak enggau ubah segang pemansang.