BN Sarawak udah lama nyikap diri napi PRU14
KUCHING: Barisan Nasional (BN) udah lama nyikap diri napi Pengawa Bepilih Besai ke- 14 ( PRU14) ke deka digaga dalam kandang taun tu, lalu bebendar agi gawa ngulihka mayuh agi penuduk Parlimen dipenggi BN baru.
Sekretari Besai BN Nengeri Sarawak, Dato Sri Dr. Stephen Rundi anak Utom madah BN udah nyikap diri lalu pechaya sida agi ulih menang ba semua penuduk BN di nengeri tu.
“Kami (BN Sarawak) udah lama nyendiaka diri. Enti baka kerita, udah masuk ‘gear lima’ taja pan mangku ‘pengawa’ ke mayuh agi empas ke sekali tu, ngambika ulih ngetanka penyampau penuduk ke dimenang maya PRU13 (2013).
“Lalu nambah enggau nya, kami mega pechaya ulih ngambi sekeda penuduk pulai baru (ke alah maya PRU ke-13 suba), nya alai kami bebendar gawa lalu deka ngambi penuduk nya pulai baru,” ku Dr. Rundi madah maya dikerandau Utusan Borneo ditu, kemari.
Dr. Rundi ti mega nyadi Menteri Utiliti Sarawak madahka iya pechaya BN ulih ngetanka 25 ari 31 penuduk Parlimen ke dimenang maya PRU tu tadi.
“Dalam timpuh nya mega, ngerampas pulai baru sekeda kerusi ke di ambi ulih penyakal sebedau tu,” ku iya.
Dr Rundi ti mega nyadi Sekretari Besai Parti Pesaka Bumiputera Bersatu (PBB) madah BN udah lama ngatur program betemu enggau rayat sereta pengundi.
“Nama pengawa ke udah digaga iya Tun Mahathir dalam kandang 22 taun iya nyadi Menteri Besai. Nama kebuah baru diatu iya baka ke kiruh endar pasal Sarawak,” ku iya ke beratika lima pemerat ‘Tawaran Baru’ (ke Sabah enggau Sarawak) ke di rintaika iya, ti mega nyadi chairman Pakatan Harapan (PH) bedau lama tu tadi,” ku iya.
Dalam lima pemerat ‘Tawaran baru’ ku iya, iya nya Hak Perintah Wilayah, Hak Petroleum enggau Asil Ke Sama Rata, Hak Pemansang Pemun Infrastruktur enggau Tanah Saksama, Hak Pelajar ke Bekualiti, enggau Hak Pemansang Ekonomi ke Sama Rata sereta Pengulih Nembiak, Orang Indu enggau sida ke Minoriti.
Lebuh di asuh nimbal penyarut entara Parti Sa’ati Rayat Sarawak (SUPP) enggau Parti Rakyat Bersatu (UPP), Dr Rundi madah pengawa ke pengabis manah ngemutarka penyarut nya deka digaga sebedau PRU ke-14.
“Kami (BN Sarawak) deka ngiga jalai ngemuntarka penanggul ke nyadi entara SUPP enggau UPP lalu nya enda tau enda diputarka sebedau PRU14,” ku iya lalu nandu baru madahka penyarut ke lama entara kededua parti nya ulih ngeruga pemujur BN.
Ba lansa bukai, maya PRU ke-13 tu tadi, BN Sarawak menang 25 penuduk Parlimen, lalu enam penuduk bukai diempu penyakal, iya nya lima diempu ulih Parti Tindakan Demokratik (DAP) lalu Parti Keadilan Rakyat (PKR) semina siti aja.
Enam buah penuduk ke diempu penyakal, iya nya di Bandar Kuching, Stampin, Sarikei, Lanang, Sibu (DAP) lalu Miri (PKR).
Sebedau tu, mayuh orang nyengkaum Sapit Menteri Besai ti mega nyadi Sapit Chairman BN Datuk Seri Dr Ahmad Zahid Hamidi kala melabaka PRU ke-14 deka digaga abis Taun Baru China tu ila.
Hari besai Taun Baru China deka disambut kena Hari Lima enggau Hari Enam (16 enggau 17 Februari) 2018, lalu haribulan ke penudi mandat Perintah Besai dipegai BN, iya nya kena 24 Jun 2018 lalu PRU14 enda tau enda digaga dalam timpuh 60 hari, ari hari penudi haribulan ke ditetapka nya.