James Chella andalka pemansang pelajar nembiak di Saratok
SARATOK: Dr. James Chella ngena inisiatif diri empu nyaup ngemansangka pelajar nembiak ba Parlimen Saratok.
Naka ke diatu iya udah ngaga lima bengkah Licha Motivasi ba empat buah sekula primari enggau sebuah sekula sekondari.
Iya siku ari peranak menua nya bela ngining deka bediri nengah tikit Barisan Nasional (BN) ba penuduk Parlimen Saratok maya Pengawa Bepilih Besai Ke-14 (PRU14) ti deka datai.
Maya ngatur licha enda bebayar tu Dr. James lebih agi ngemeratka pekara bekaul enggau Chara Ngena Jam Peresa, Chara Nyaut Peresa enggau Chara Belajar.
Semua chara ti dikunsika iya tu endang dikena iya empu maya belajar suba sebedau mujur nyadi lutur.
Chara iya nya mega dikena iya ngajar bala anak iya.
Tiap bengkah licha ke diatur iya, iya endang semampai madahka semina pelajar aja ulih nginsur tikas pengidup.
“Besekula endang nadai mai pengerugi laban dudi hari ila kitai deka bulih asil ti ulih ngangkatka pengidup diri enggau ruang bilik,” pia ku iya madah.
Iya mega meransang bala nembiak seruran ngemer- ankan pengawa besekula sereta anang mantul ngapa taja napi penanggul tauka nadai pengerindu ba sekula.
“Kitai anang jugau ngambika bansa kitai enda jauh tinggal pemansang ari bansa bukai,” ku iya madah baru.
Ba ruang bilik Dr. James, kelimpah iya empu bini iya mega siku lutur.
Pengeransing seduai melaki bini nyengulaka anak nejuka lima iku anak seduai bela murih nyadi lutur.
Nya alai, diatu iya ngasaika chara seduai ngembing anak belajar patut dikunsika ngagai bala bukai lebih agi bansa Iban ke diau di menua pesisir.