Seraban tuai rumah di Meluan kena keduan nyain dokumen

JULAU: Seraban tuai rumah ari sitak Meluan ditu madahka sida dikeduan nyain dokumen dikena ngelakuka chalun baru ungkup sitak Parlimen Julau maya Pengawa Bepilih Besai ( PRU) Ke- 14 ti deka datai.

Sida tu nyengkaum TR Batik, TR Awit, TR Mancha, TR Ringgit Jampong, TR Gayu sereta beberapa iku tuai rumah ke bukai ari Nanga Mujok, Nanga Buloh enggau Nanga Apo.

Pekara tu diterang rambau randau begulai enggau penyandang empat penggal penuduk Parlimen Julau Datuk Joseph Salang Gandum rambau ngulu Program Begulai Enggau Pemesai di Rh Sabang Raoh di Rantau Limau ditu.

Sida sebuat madah dalam pun bulan tu tadi, sida udah dipadahka ex- TR Balang ke alai sida ( Raban TR) udah dikangau ngulu program merarau di Sarikei ti deka digulu Kaban Kunsil Nengeri ( ADUN) Meluan, Roland Duat.

“Taja nadai surat kangau ke nyengala, tang kami netapka diri ngulu program nya laban pechaya program diatur Roland,” pia ku TR Awi ari Nanga Mujok.

“Taja pia, lebuhka datai di restoran nya, nadai meda pengari rayat kami kelimpah ari ex- Kaban Parlimen ( MP) Julau, Datuk Sng Chee Hua, sereta bisi mega bala bukai datai,” ku iya madah.

Ku TR Awit, sida udah nya dikangau tama ke bilik betemu enggau Sng sereta dipinta nyain dokumen, tebal agi sida enda nemu tuju nya.

Ku iya, taja pia, Sng nadai madah sekalika anak iya, Larry Sng deka bediri minta pilih nyilih Salang nyadi chalun BN di Sitak parlimen Julau maya PRU tu ila.

Ku TR Awit nambah, nya kebuah iya (Sng) ngangauka sida ngulu program nya.

Nitih ku TR Awit, iya madah ngagai Sng ke alai sida semina deka nyukung chalun BN maya PRU ti deka datai.

“Kami udah nya diberi mata duit RM250 ngambika nyain seraya RM50 da agi ungkup chop ba dokumen nya,” ku iya nampung.

Siku agi tuai rumah iya nya TR Mancha madahka diri setuju datai begulai enggau bala bukai laban iya baru di- padu mangku pengawa nya beberapa bulan ke udah.

“Tambah mega, aku dipadah nya program betemu enggau Roland,” ku iya.

Iya madahka dibayar penyampau ke sama pengudah nyain dokumen.

TR Guyu ari Nanga Buloh madah, keterubah iya enggai datai, tang enda entu nemu nama batang pekara ke benung nyadi.

“Berindik ari aku kaban Parti Rakyat Sarawak ( PRS), nya kebuah aku mai dua iku bakih ke bukai datai ngulu program nya,” ku iya nerang.

Ku iya, Sng nadai madah tuju atur program nya kelimpah minta nyain dokumen lalu iya deka dibayar udah tu.

Ba tubuh TR Ringgit empu, taja iya udah nyain dokumen sereta dibayar enggau penyampau ke sama, iya madah ngagai Sng ke alai iya tetap nyukung Salang.

Berebak enggau nya, Salang udah ngelalau sida bejejimat sereta berati silik dulu tetiap kali sida dipinta nyain sebarang dokumen.

“Ba kes tu, kita semua udah nyain dokumen ti madahka kita udah nyukung ukai chalun BN bediri minta pilih di Julau enggau nadai berandau enggau nembiak redak kita empu dulu.

“Kita mega udah dibayar ngena mata duit nyadi pemeri enda ditemu kita nama pangka iya,” ku iya.

Iya ngelalau sida tau dikelesey, dikemaruh sereta dipejah nyual nama komuniti dikena ngulihka duit.

Ku Salang, chalun deka disabung mega peranak luar lalu ukai bansa Iban sereta bisi ati ngiga nama enggau kuasa ba penuduk majoriti bansa Iban ( 97 peratus).

“Bala anak enggau uchu kitai empu enda puas ati enggau pemutus kita. Ulah kita deka dipeda nganchurka komuniti,” ku iya.

Ku Salang, myema iya enda dapat agi gawa, penyilih iya abis nadai bansa Iban peranak menua nya ti bisi penau.

“Ari 222 penuduk parlimen di serata menua, semina semilan penuduk dipenggi komuniti Iban. Tu patut dijaga,” ku iya.

Taja pia ku iya, iya enda nyima ngagai sida TR Awit sebuat, iya deka seruran ngabas sitak menua sida ngemai projek MRP.