Tu sebagi ari semilan pemerat opis KKWKPK ungkup nengeri tu nyengkaum program ‘ Wacana Bestari’
KUCHING: Opis Kaunsil Pemansang Rama (MPS) Nengeri Sarawak, baruh pegai Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit ( KKWKPK) ngungkupka RM1.04 juta kena ngaga Pansik enggau Pemansang (R&D) nyengkaum RM60,000 kena ngaga program ‘Wacana Bestari’, ke nyadi pemerat opis nya.
Menteri opis nya, Dato Sri Fatimah Abdullah madah, ke nengeri Sarawak, ari pemayuh pekara, opis menteri nya betatika semilan pekara berat.
“Ari baruh MPS, sebengkah ari sekeda aktiviti ke nyadi pemerat, iya nya ngaga pansik enggau pemansang.
“Kami mega deka ngaga program, pengudah ngelala ni bagi pemerat ke patut dipansik, baik nya polisi, program intervensi, tauka program ari sukut meri penemu sereta nagang (pencegahan, iya nya betatika atur nya bepelasarka bukti (evidence).
“Ketegal nya, nengah MPS, pansik nya berat endar,” ku Fatimah madah ba aum me- dia pengudah bechairmanka licha bekait enggau Perambu strategi MPS di Bilik Baum opis menteri nya di Baitulmakmur ditu, kemari.
Sama bisi enggau ngulu aum media nya kemari, Menteri Muda Pengelantang Pendiau Komuniti, Datuk Francis Harden, Menteri Muda Orang Indu, Ruang Bilik enggau Pemansang Anak Mit, Rosey Yunus, Sekretari Mendam Opis Menteri KKKWKPK Dr Saadiah Abdul Samat and Sekretari Eksekutif MPS, Dr. Zufar Yadi.
Iya nandu baru madahka, ke taun tu (2018) bisi 6 bengkah pansik ti deka digaga, iya nya ke pansik ke pengabis besai, Indeks Pengelantang Rama Sarawak (IKSS) ke deka beratika semua pekara nya.
“Opis menteri tu udah bisi Sempekat Pemereti Ati (MoU) enggau dua buah universiti ke deka mansik pekara tu, iya Universiti Malaya (UM), UiTM Sarawak, enggau UNIMAS ke dipadu lalu deka berengkah ngaga pansik nya ari Januari 2018 ngagai ujung taun tu.
“Kelimpah ari nya, tu siti pengawa ke besai endar laban iya deka mungkur pengelantang pendiau rama ba renggat menua, pelilih menua enggau sitak,” ku iya.
Bepelasarka pansik nya ila, ku iya, opis menteri nya nemu ni bagi sukut ke nyadi penegap tauka pengurang, ngambika muntang di perambu enggau silik agi, baik nya ba renggat menua, pelilih menua, tauka sitak…Ni bagi pemansang rama enggau pengelantang pendiau rayat.
Ba lansa bukai, baruh KKWKPK, bisi semilan pekara pengawa rama ke dikemeratka, iya nya penanggul gian dadah, pengawa salah ke bekait enggau reta tengkira, orang ti nadai pengentap pendiau, pengawa salah seksual ba anak mit enggau orang indu, nembiak indu ke ngandung, penyalah nyamah di ruang bilik, HIV/ AIDS, penanggul tikah enggau sarak sereta dokumen kad pengelala.
“Semilan pekara tu mega bisi tagit kediri emu, iya nya dalam kandang lima taun tu ila (berengkah ari 2016-2020), dikearapka kes penanggul nya ulih dikurangka, pukul rata datai ngagai kusung peratus.
“Pemerat pasal penanggul tu ngambika kami ulih beratika ‘trend’ pengawa rama nengah data pengawa rama enggau e-data pengawa rama ba renggat pelilih menua/ nengeri, beratika penanggul pengawa rama nengah Aum Komiti Pemansang Pengawa Rama ke udah ditumbuhka.
“Nya alai, pemansang palan data pengawa rama berat endar laban ulih alai nyimpan, ngumpul, ngemutar sereta ngempung ( menintegrasi) pemadah enggau data pengawa rama, nengah chara ke sistematik, ke ulih meri (petunjuk) ke ulih dikena merambu, ngatur, ngemata sereta (pemilaian) atur, program enggau ngaga aktiviti pemansang pengawa rama,” ku iya.
Ba program ‘Wacana Bestari’ ke diungkupka enggau bajet RM60,000, deka betatika pekara bekait enggau Pengawa Tikah enggau Sarak ke deka digaga di Sibu (Februari 2018), Pekara bekait enggau pengawa Nyelamatka orang ti nadai pengantap pendiau di Bintulu (March 2018), Pengawa Salah Seksual ba Anak Mit enggau Orang Indu di Miri (April 2018) enggau Kes bejamah dalam ruang bilik di Kuching (Mei 2018), ku iya.