Anang ngelepaska ukui tupi enti nadai pemendar Opis Vaterinari

KUCHING: Mensia mayuh di lalau enda ngelakka ukui sida lepas tauka dibai pansut enti nadai pemendar ari opis ke megai kuasa baka Opis Veterinari Nengeri ari sitak ke bisi napi penyakit rabies (ukui gila).

Opis Servis Veterinari Sarawak ( JPVS) nengah surat ke dituju ngagai Sekretariat Komiti Mutarka Penusah Ngenyit Sarawak madah, pengawa nya nyadi penyalah nengah genteran tusun ukum Seksyen 37(2)&(3) Ordinan Kesihatan Awam 1999.

“Enti orang nya ditemu salah, tau kena denda enda lebih ari RM5,000 tauka kena jil enda lebih ari tiga bulan tauka kededua nya sekali,” ku surat nya madah nengah ripot ninting hari penyakit rabies Sarawak, kemari.

Naka kediatu, ke semua penyampau ke dipadah kena penusah laban rabies di Sarawak, iya nya 27 buah sitak, iya nya Serian (20), Sri Aman (1)enggau Kuching (4), Samarahan (1) sereta Sarikei (1).

JPVS mega ngelalau mensia mayuh nagang jelu ke di intu sida iya, baik nya udah dituchuk enggau tauka bedau, begulai enggau jelu ke di lepas.

Nyema mensia mayuh beratika ulah jelu sida iya, ari jinak nyau nyadi mangah tauka ganas, ngigit barang utai ke dipeda sida iya engkebut, hidrofobia meda ai tauka panchar mata panas (enggai meda tauka kena ai sereta panchar mata panas), ka agi diau kediri sereta mayuh ai liur lalu dipeda (gelisah) enda tau enda ngeripot ngagai JPVS ba lumur talipaun 082612949 tauka 082-611607 enggau jampat.

Ba pengawa nuchuk vaksin ke bisi digaga taun 2017, program nuchuk vaksin sereta ‘survelan’ jel ngerikod urung 42,409 iku, lalu pemutus penyampau sampel positif dirikod dalam 73 buah sampel nyengkaum enam ari mayau.

Program nguntrul pemayuh ukui ke nadai orang bempu ( terbiar) manggai dalam 3,282 iku ukui.

Ba lansa bukai, Opis Pengerai Menua dalam surat sida iya ngagai komiti nya, bisi ngeripot urung 18 kes baru kena gigit jelu bisi di rikod, iya nya di Kuching ( lapan), Samarahan (siti), Serian (dua) enggau di Sri Aman (tujuh), lalu ngujungka penyampau kes kumulatif kena gigit jelu ari 1 April (2017) manggai urung 5,735, lalu sida ke udah dituchuk enggau anti rabies (2,237).

Mensia mayuh ke kala kena gigit ukui, dipinta datai beperesa enggau jampat ngagai barang palan pengerai ke semak enggau sida iya.

Dalam timpuh nya mega, mensia mayuh mega dilalau seruran nyeliahka diri ari kena gigit jelu kelebih agi ukui, lalu enti sema sida iya bisi kena gigit ukui, tuchi abi telih nya enggau jampat, ngena sabun sereta ai beresi, ke ditejuka (mengalir) dalam timpuh 15 minit; lalu berubat enggau lengkas di klinik tauka sepital ke besemak enggau sida iya.