Raban Bomba Sarawak nyikap diri napi penusah ampuh bah

KUCHING: Opis Bomba enggau Penyelamat Malaysia (Bomba) Nengeri Sarawak tetap nyikap diri betapi enggau penusah ampuh bah taja pan pasang besai dipelabaka nadai nyadi, maya musim pengujan.

Direktor nya Nor Hisham Mohammad madahka, Bomba serata nengeri tu udah besedia berindik ari gaya hari ti enda tentu meruan.

“Kami ( Bomba) endang udah besedia.

“Dipelaba ujan bangat bisi nyadi. Tang kitai ngarapka ok laban nadai pasang besai,” ku iya lebuh ditanya Utusan Borneo, kemari.

Bepelasarka riput surat kabar kemari, di beberapa kandang menua di nengeri tu baka Kuching, Mukah, Sibu, Sarikei, Betong, Sri Aman, Samarahan enggau Serian dipelabaka kena ujan bangat dalam timpuh Rabu (seharitu) ngagai Jumaat tu.

Lalau gaya ari ( renggat kuning) nya dikeluarka Sekretariat Komiti Mutarka Penusah Ngenyit Nengeri Sarawak nengah penerang berita ensanus.

Hisham madahka piak sida udah besedia ari segi anggota enggau logistik dikena betapi enggau penyadi penusah ampuh bah di nengeri tu.

Nitihku iya, tetiap opis bekaul dibagi ngagai tujuh zon iya nya Zon Kuching, Samarahan, Sri Aman, Sibu, Bintulu, Miri enggau Zon Limbang ti mungkur 29 Balai Bomba dan Penyelamat (BBP).

“Kami (Bomba) bisi personel balai iya nya 1,181 iku ti nyengkaum personel balai bisi 1,137 iku, personel PGO & Operasi (30 iku) sereta personel zon bisi 14 iku.

“Raban ti gawa dibagi 12 jam bisi 394 iku enggau gawa 24 jam bisi 590 iku anggota,” ku iya.

Nambahka nya Bomba nengeri tu dibantu Tim Bomba Sukarela ( PBS) ti bisi 43 tim ke mungkur 2,100 iku kaban PBS ti sikap ngena 19 buah perengka pengangkut.

Lebuh ti ngenang logistik ke disediaka piak iya, Hisham madahka perengka pengangkut ai enggau darat sereta kereban penyelamat bisi disedia ba semua tujuh zon serata nengeri.

“Kami bisi nyendiaka 46 buah bot aluminium, enam bot fiber, tiga kevlar engga 1 ARIB, tu perengka penangkut ai ke disediaka kami.

“Lalu perengka penangkut darat ti disediaka ba semua zon iya nya 18 buah lori (3 tan enggau 5 tan), tiga buah bas, 71 buah perengka pengakut 4 x 4 enggau 14 buah van urvan.

“Kelimpah ari nya kami bisi nyendiaka 419 unit jaket pengelikun enggau 55 unit set scuba,” ku iya.