Kolej Optopreneur, PKWR Btg Lupar nengah Bank Giving nyediaka RM2.24 juta sekulasip
SRI AMAN: Kolej Optopreneur enggau Palan Servis Pengari Rayat ( PKWR) Parlimen Batang Lupar nyediaka sekulasip penyampau RM2.24 juta nengah Bank Giving ngagai raban nembiak ke apin bulih kereja sereta lepas Sijil Pelajaran Malaysia (SPM) di sitak nya.
Orang ti numbuhka The Giving Bank, Dr Janson Ang madahka pengawa nyediaka 100 sekulasip ba tikas diploma ngagai bala nembiak ti deka nampung pelajar sida tang bisi penanggul ba pekara belanja.
Nitih ku iya, pengawa tu enda ulih dikereja nyema nadai sukung ari Kolej Optopreneur.
“Atur meri sekulasip tu muntang endar iya nya nembiak meseti ngayanka pengingin diri deka belajar, nampung pelajar sida. Bala sida mega meseti ngena memanah peluang ke diri enggau meseti bisi disiplin sereta bisi penetap nembuka kus nya,” ku iya.
Iya mansutka jaku tu rambau Program Meri Penerang Ngagai Nembiak Ke Bisi Ati Minta Sekulasip bekaul ti diatur Kolej Optopreneur enggau Palan Servis Pengari Rayat Parlimen Batang Lupar bepalan di Balai Suarah semak ditu.
Pia mega ku iya, 100 sekulasip tu deka dipunka Menteri Pemansang Orang Indu, Ruang Bilik enggau Komuniti, Datuk Seri Rohani Abdul Karim nengah palan servis komuniti iya, iya nya Parlimen Batang Lupar.
Datuk Seri Rohani Abdul Karim madahka tuju pengawa nya dikena meri penyedar ba pengawa nyediaka scholarship tu ngagai Sarawak ngambika sida ke bisi ati tau nganjung peminta.
“Kami pechaya semua orang patut nerima pelajar ke sama. Ngiri penemu nyadi pengawa beguna endar ba tetiap renggat pemansang.
“Tu deka meri pengarap ngagai bala anak sereta peluang ngasaika pekara ti enda kala diasaika sida sebedau tu sereta mantu sida nyadi komuniti ti menyana. Kami begulai ngemai pengelantang enggau penyenang ngagai pengidup bala nembiak dudi hari baka ti udah disemaya di sitak Parlimen aku ditu,” ku iya nerang.
Ba lansa ke bukai, Pemungkal Kolej Optopreneur, Profesor Dato Dr. Chin madah, scholarship tu deka meri pemaik ngagai mayuh nembiak kelebih agi di sitak Parlimen Batang Lupar nya.
“Baka ti ditemu kitai, pengudah nembuka pelajar ari kolej enggau universiti, mayuh nembiak ngiga pengawa laban sida meseti mayar jali akademik.
“Taja pia, enggau scholarship tu, sida nadai ditating utang lebuh sida pas,” ku iya.
Ku Rohani nambah baru, sida keran nyediaka 100 scholarship ngagai sida ke lepas SPM ti enda entu benasit di Sarawak nampung pelajar sida ba Diploma Pengurusan Runcit penyampau RM2.24 juta.
“Diploma iya nya program tiga taun. Nyema nembiak enda tetangkup pinta ungkup program Diploma, sida tau milih nitihka Program Sijil Runcit enggau Jaku English. Tu nyadi pinta enda bechiping ti dibuka ngagai semua bansa, etnik enggau penempa diri.
“Barang sapa ti ngasaika diri begunaka peluang tu tau betanya ngagai The Giving Bank nengah email (we@thegivingbank.com) tauka lumur telefon (03-90541383),” ku iya nambah baru. ‘
“Nyadi Menteri Pemansang Orang Indu, Ruang Bilik enggau Komuniti, aku ngarap ulih meda bala nembiak di Sarawak teulihka pemaik ari pelajar sereta mansang besai nyadi orang ti landik, pintar sereta pegari nama.
“Kami bisi juluk deka nyadi orang ti nyedia besai agi enggau ngemai program penyulut ngagai tikas nasional ti deka meri pemaik ngagai mayuh agi nembiak,” ku Rohani nampung silik.
Sama bisi datai Sekretari Politik iya, Saifudin Matsah sereta peranak ke bukai.