Joseph Salang agi nerima sukung ngetanka penuduk di Parlimen Julau
JULAU: Kaban Kaunsil Besai Parti Progresif Demokratik ( PDP) ditu madahka pengawa sekeda orang nyaup chalun ke dikerindu sida nyadi chalun baru bediri ba Parlimen Julau maya Pengawa Bepilih Besai Ke-14 (PRU-14) deka datai semina ketegal ngulihka pengelantang diri.
Belayong Jampong ti mega Chairman PDP pampang Meluan madah, pengawa baka nya endang enda dikemendarka parti tang dikereja sida ti ngira diri empu aja.
“Sida tu bejalai ngeringka chalun sida madah ngagai rayat chalun sida nyadi chalun baru bediri ba Parlimen Julau ba PRU14 tu.
“Ulah baka tu enda dikemendar enti ukai sida ti ngira penguntung aja,” pia ku iya maya bejaku ba Pengerami Pemesai Begulai enggau Mensia Mayuh ba Rumah Sabang, Rantau Limau, hari Minggu tu tadi.
Pengerami nya digulu Kaban Parlimen Julau Datuk Joseph Salang Gandum ti mega Sekretari Besai Parti Rayat Sarawak (PRS).
Ku Belayong, sida ari PDP di Meluan enggau Pakan baka raban parti komponen Barisan Nasional (BN) ke bukai endang agi ngandalka Salang bediri baru ngetanka penuduk parlimen dia.
“Kebuah pia laban kitai meda iya mengkang mujur bejalaika tanggungpengawa enggau manah nyadi pengari rayat ba ditu,” ku iya madah baru.
Bela besepenemu enggau Belayong, Sapit Chairman Raban Nembiak PRS Pakan, Franklin Kaya madah, sida deka bebendar agi nyukung Salang ngambika agi megai penuduk nya maya PRU14 tu.
“Kami ditu empu enda nemu nama kebuah orang menua bukai nambahka sida nya mega ukai raban PRS berani amat madahka Salang tu deka diganti,” pia ku iya madah. BINTANGOR: Menyadi Kaban Parlimen (MP) Julau Datuk Joseph Salang Gandum, Minda Mandau bebadi ba penusah jalai alun, semak Simpang Sing Ba, Jalai Bintangor-Sibu, malam ensana.
Ketuai Polis Pelilih (KPD) Meradong Supt Mohamad Hafipi Mohd Salim madah, niang, 60, dipadahka bebadi tekala nya ba endur penusah nyadi.
“Maya penusah ke nyadi 7.40 malam tu, niang ti ngena motosikal dipelabaka tepawah,” pia ku iya maya berandau enggau pengarang berita, kemari.
Niang peranak Rumah Kasin, Muara Bunut, Bintangor.
Hafipi madahka kes tu deka dipansik nengah Seksyen 41(1) Akta Pengangkutan Jalan (APJ) 1987.