Dua projek RTP di Piasau diperambu deka tembu dalam bulan Februari
MIRI: Dua projek Program Transformasyen Menua Pesisir ( RTP) di baruh sitak Piasau dipelaba deka tembu entara ujung bulan enggau dalam pun bulan baru, pia ku Datuk Bandaraya Miri, Adam Yii.
Kemari, Yii ngetuaika raban injinir kaunsil mengeri enggau bala kaunsilor bejalai ngabas kandang menua semak Kampung Luak enggau Jalai Luak Bay (semak Kedai Renchit Ah Hong).
Kereja ngangkatmanahka sistem parit di Kampung Luak enggau Taman VC Chong ti udah dipejalai kenyau ari 5 September taun nyin tadi benung dipejalai, lalu dipelaba tembu kena 4 Januari.
“Taja pia, berindik ari tali karan lampu jalai dipindah baru raban Sarawak Energy Berhad ( SEB), projek tu napi pengelaun. Naka diatu, kereja ngangkatmanah ngemesaika parit urung 560 meter pemanjai, udah manggai 75 peratus tembu, lalu nya dipelaba deka tembu kena 31 Januari,” ku Yii madah ngagai pengarang berita.
Ari penembu projek ke beungkus nyauka manggai RM600,000, Yii ngarapka isu ampuh bah ti suah mangka kandang menua nya deka teputar.
Ba lansa ke bukai, projek RTP ngemesaika jalai udah dipejalai di Jalai Luak Bay (seberai Kedai Renchit Ah Hong) dipelaba deka tembu sebedau Taun Baru China.
“Ke amat, projek ti berengkah digaga kena 2 Oktober 2017 tu tadi patut tembu 1 Disember taun nyin tadi. Taja pia, ketegal isu ke sama, tali karan lampu jalai dipindah, projek tu mega tejanggal enda lama.
“Ke diatu, kami suah ngatur randau enggau SEB, berandauka jalai ngelancharka pejalai projek nya, ngambika iya ulih tumu tembu. Renggat ke diatu, kami agi nganti SEB narit tali karan ba tisi jalai sereta kereja resurfacing semina ulih digaga pengudah SEB bejalaika pengawa sida,” ku Yii.
Projek beungkus RM870, 000 - ngemesaika Jalai Luak Bay, 920 meter pemanjai.