663 iku nembiak sekula nerima pemeri ari FELCRA Berhad
SERIAN: Bisi 663 iku nembiak sekula ba empat kandang endur di nengeri tu deka nerima pemeri kereban sekula, ti keterubah endar dipejalaika FELCRA Berhad.
Menijar Besai Zon, FELCRA Berhad Zon Sarawak, Saifuddin Omar madah, pemeri kereban sekula nya deka diberi bererenggat.
Nitih ku iya, perintah nengah FELCRA ngungkupka belanja urung sepenyampau RM6.3 juta dikena nyendiaka kereban sekula ngagai urung 18,000 iku nembiak di serata Malaysia.
Lalu ke siku nembiak deka nerima sepenyampau RM350 ti diberi iya nya dua pasang baju sekula, dua pasang tanchut sekula, kasut, beg enggau ke bukai, ku iya.
“Tu keterubah endar, FELCRA Berhad meri pemeri kereban sekula nengah program Tanggungpengawa Rama Korporat (CSR).
“Di Sarawak, kitai bisi pengelebih laban kitai meri mata duit RM350 ke siku nembiak. Nya alai kitai ngarapka apai indai ulih ngena duit tu ngena chara ti betul.
“Tuju kami meri pemeri tu dikena ngelempungka tating belanja apai indai berindik ari ungkus idup diatu majak tinggi,” ku iya.
Saifuddin mansutka pekara nya dalam jaku pengelalu ba pengerami Program ‘Ceria Kembali Ke Sekolah FELCRA Berhad’ ti diatur ba Dewan Orang Kaya Pemanca Sereng Sek. Keb. St Edward Belimbing, Padawan ditu, kemari.
Program nya dipenyadika Menteri Muda Pemansang Tanah Adat ti mega Kaban Kunsil Nengeri ( ADUN) Tarat seraya iya diberi basa nyuaka pemeri mata duit nya ngagai 151 iku nembiak sekula dalam Genturung pendiau Belimbing, Kota Padawan.
Kelimpah ari dalam Genturung Pendiau Belimbing, FELCRA Berhad mega ngagihka pemeri nya ngagai 134 iku nembiak dalam kandang menua Samarahan; Batang Lupar (28 iku) enggau di kandang menua Limbang bisi 350 iku nembiak. KUCHING: Siku orang gawa perintah diukum jil 2 bulan enggau diperintah mayar RM273,600 pengudah ngakun salah kes makai suap ba pechara di Kort ‘Khas’ Makai Suap di Kuching kemari.
Abdul Wali Fathir ,30, pemantu pemesai RELA Pelilih Serian ngakun penyalah ke digaga kena 3 Mei 2012 ba mua Akim, Nixon Kennedy Kumbong.
Kes ditemu Komiti Penyeliah Ulah Makai Suap (SPRM) ke alai iya (Abdul Wali) bisi ngenataika penerang ‘Pengakuan Kehadiran Anggota RELA’ 190 iku nyadi Pelapor Peti Undi di Pelilih Serian ungkup timpuh 1 nyentuk ngagai 30 April 2012.
Nengah penerang bebula nya, iya ngenataika pinta bayar ngagai Indu Opis RELA Sarawak ba penyampau RM54,720 ke alai nadai siku pan RELA gawa ba maya timpuh ke disebut.
Abdul Wali ditemu salah nengah Seksyen 24 Akta Anti-Rasuah Malaysia 2009 ti netapka ukum jil enda ngelui 20 taun enggau ukum mata duit lima kali lipat ari penyampau suap.
Iya ke enda diarika luyar minta akim ngelempungka ukum ketegal ti udah enda kereja agi sereta bisi dua iku anak ke beumur 3 enggau 5 taun.
Ba kort ke sama kemari, siku polis bepangkat inspektor, Azrul Izman Shadan bela ngakun salah ba tuduh makai suap ke dikereja iya di Sibu kena 13 Mac 2015.
Iya ngakun nerima suap RM5,000 ari siku orang di Rh Hotel urung jam 4 lemai enggau tuju mulaika barang emas ke dirampas.
Azrul diukum jil 20 hari enggau mata duit ba penyampau RM25,000.
Akim ke sama ngeletak ukum nengah Seksyen 24 Akta Anti-Rasuah Malaysia 2009 ti netapka ukum jil enda ngelui 20 taun enggau ukum mata duit lima kali lipat ari penyampau suap.
Kededua Abdul Wali enggau Azrul didawa luyar SPRM, Dzulkarnain Raufan.