Timpuh ngaga dokumen pengelala dilanjar ngagai taun tu

KUCHING: Sekeda Gerempung ukai Dikuasa Perintah (NGO) Dayak udah minta hari bulan kepenudi ngaga tingki ungkup peranak nengeri tu ti nadai tingki dilanjarka ngagai taun tu.

Berindik ari nya, pengari ari Serakup Gerempung Dayak Iban Sarawak (SADIA) Bill Jugah madah seraban NGO baka SADIA, S4S (Sarawak for Sarawakian) enggau Saya anak Sarawak ( SAS) beterima kasih ngagai Opis Pengerijista Bansa pampang Sarawak ( JPN Sarawak), Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKK) sereta Menteri di Opis Menteri Besai, Datuk Joseph Entulu enggau bala staf opis nya, ke udah nimbal peminta nya.

“Penyampau peminta ke mujur ngaga kad pengelala ke udah digaga NGO tu sereta di proses JPN nengah udah mujur ngelui ari 100 peratus, enggau penambah 23 iku agi ke bisi napi penanggul bukai, dibai ngagai JPN,” ku Bill madah nengah seiti penerang ngagai Utusan Borneo.

Iya nandu baru madahka, taja pia, penyampau peminta ke dikelala raban NGO tu baru mimit aja ke udah mujur, kelebih agi ba sida ke udah bisi kad pengelala, lalu diau enda jauh ari bandaraya Kuching.

“Agi mayuh komuniti ke diau ba menua pesisir tauka ulu sungai enda nemu nama pengawa ke bendar raban ‘taskforce’, lalu komuniti ke diau di menua pesisir enggau ulu sungai, ari Kapit ngagai Ulu Baram, enda nemu pemerat pengawa ‘taskforce’ tu.

“Nya alai, kami (NGO) minta JPN sereta sekeda opis tauka ejensi perintah minta ukai semina ngelanjarka timpuh nya, lalu ngaga prosedur ke sistematik kena beratika tiap iku rayat menua tu ngambi bisi kad pengelala, lalu mutarka semua penanggul rayat ke nadai warganegara,” ku iya.

Bekait enggau pekara tu mega, Bill madahka pemujur peminta ngaga kad pengelala tauka status warganegara ari baruh NGO tu, mayuh datai ari Mongkos, Tebedu, Serian, enggau Balai Ringin.

Tang kemari, agi bisi 23 peminta ngaga kad pengelala tauka dokumen sida iya napi mayuh macham penanggul, ari ke nadai nyimpan sebarang dokumen ari kelia maya Malaysia ditumbuhka, status penuduk tetap, , enggau anak sida iya ke udah nurun sekula tang nadai surat beranak laban di tinggal ulih apai indai sida iya.

Raban nya kemari, ukai semina ari komuniti Dayak aja, tang nyengkaum Cina enggau Melayu ari Balai Ringin, Serian, Muara Tebas, Bintulu enggau Selangau.

Siku aktivis ari S4S, Collin Siaw madahka penadai tauka pemisi infrastrktur jalai alun, sereta penyauh pendiau entara komuniti tu ari opis perintah, nyadi penanggul ke besai, kebuah mayuh komuniti ke enda ngerijista anak tauka sida iya empu,ku iya.

“Seraban ruang bilik bebansa Melayu ari Kpg Gobil kala minta tulung ngagai aku ke napi penanggul pasal kad pengelala, taja pan tiga iku anak iya bisi MyKad.

“Nya alai, patut bisi kimpin meri penemu sereta timbal ijinsi Perintah mai perengka guna tu ngagai ( ari JPN) ngagai komuniti, ari ngasuh bala sida tu ke kurang pemisi begigaka bantu,” ku iya.

Aktivis Peter John anak Jaban madah mayuh kes ke ngait bala anak mit ke enda bedosa ketegal pengawa apai indai sida iya, ke enda ngerijista bala anak sida iya.

“Apai indai ke enda mujur mai anak sida iya direjista, enda patut nerima ‘ukum’ bansa nya ari apai indai sida iya, ke ngujungka lebuh sida iya besai napi, mayuh agi macham penanggul bukai,” ku Peter.

Siku agi pengari ari S4S, Dino Watson madah patut bisi perengka guna, siti prosedur baru ke nyengkaum pelajar enggau proses ngerijista komuniti (ke nadai kad pengelala) di bai JPN ngagai menua pesisir.

“Semua perengka guna tu enda tau enda sistematik lalu bepelasarka merit, nadai (political or social bias).

“Bisi sekeda tuai rumah sereta penghulu, ke main pilih ‘ bulu’, lebuh diasuh nyain pom ulih orang ke minta ngaga dokumen nya, enti ditemu tauka dipeda enda nyukung tuai-tuai komuniti, ngelubahka agi proses nya,” ku Dino.