Isa: Industri muzik Dayak randaka lagu ti kreatif sereta original

KUCHING: Gerempung Pengemeran Seni enggau Main Asal Dayak Kuching mantaika pengirau bekaul muzik Dayak taun nyin kemari mayuh ti kurang kreatif sereta enda original, lalu sida ngarapka taun 2018 tu nyadi taun ti manah ungkup raban komposer, penulis leka lagu enggau orang ti nusun muzik.

Chairman gerempung tu Isas Lee madahka sida ti ngaul diri dalam industri muzik Dayak patut chakah dalam ngasilka tiun, leka sereta tusun muzik.

“Industri muzik Dayak diatu randaka kualiti sereta muzik enggau lagu ti kreatif. Dalam industri muzik tu, kualiti iya nya pekara ti endang dikemerat. Orang ti ningaka lagu kitai diatu makin landik lalu mayuh ti mekuh ngagai muzik ti bekualiti. Nya kebuah semina muzik ti bekualiti agi ulih besemekih lalu nyadi lagu ti tebilang,” ku iya nyemetak.

“Dikena ngetanka kualiti, kelebih agi muzik Iban, aku meransang tetiap komposer enggau orang ti nusun tiun ke bisi diatu kreatif agi; nambah mayuh elemen baru dalam lagu sida,” ku iya.

Ku Isa madah kelimpah ari melodi ti manah, muzik enggau leka lagu mega meseti bepelasarka pekara ti nyadi besehari-hari tauka pekara ti endang nyadi dalam pengidup ngambika beguna agi.

“Dikena ngangkatka lagu Iban sereta leka nya, aku meransang raban nembiak ti nyadi penulis leka lagu patut ngembuan pengelandik ti dalam ba Jaku Iban nyengkaum kaban ari Gerempung Pemansang Jaku Iban (AEDIL),” ku iya.

Ba pekara ke bukai, Isa madahka RTM enda patut ngambi timpuh ti lama ngemendarka sekeda lagu tauka album, kelebih agi lagu etnik laban sida bisi orang ti engkeman ngaduka pekara nya.

“Dalam pekara ti nyadi diatu, muzik Dayak andalka orang ti kreatif nusun lagu ba taun 2018 ti ulih nyapai pemunta bala peninga enggau peminat,” ku Isa.