Pesereta Felcra dilalau meri terima kasih nengah sukung ngagai BN
SERIAN: Pesereta FELCRA Berhad dilalau patut berasai temegah ati sereta beterima kasih nengah chara meri sukung tegap ti nadai bebagi ngagai perintah Barisan Nasional (BN) ba Pengawa Bepilih Besai Ke-14 (PRU14),ti deka datai tu.
Menteri Muda Pemansang Tanah Adat Datuk Roland Sagah madahka, nya dikena ngenukuka politik ti tegap sereta rayat ti lantang jemah ila.
“Semua pesereta Felcra patut ngayanka semua temegah ati enggau terima kasih enggau chara meri sukung tegap ti nadai bebagi ngagai perintah ke udah bisi maya pengawa PRU14, ti dipelabaka diatur sebarang maya ari diatu.
“Laban menang enggau mandat majoriti 3/4 ba parlimen amat beguna, ke tuju penegap politik ke nyadi pekara pemadu beguna nga- gai pemaik enggau pengelantang rayat, ti meri penguntung dudi hari.
“Sukung tegap kebendar iya dividen politik ti chukup berega, dikena meri terima kasih ngagai perintah ti mega megai Felcra,” ku iya.
Sagah ti mega Kaban Kunsil Nengeri (ADUN) Tarat mansutka pekara nya lebuh bejadika Program Ceria Kembali Ke Sekolah FELCRA Berhad ke diatur FELCRA Berhad ba Dewan Orang Kaya Pamanca Sereng, Sek. Keb. St. Edward Belimbing, Padawan ditu, kemari.
Ba pengerami nya Sagah nyuaka pemeri kereban sekula ti diberi ngena mata duit ngagai 151 iku nembiak sekula dalam kandang menua Belimbing.
Lebuh ke ngenang pasal FELCRA Sagah madahka, FELCRA Berhad ejen pemadu beguna transformasyen menua pesisir.
Iya mega madahka FELCRA bisi nyendiaka bantu ngagai rayat nengah mayuh macham program, pemeri enggau bantu kenyau 51 taun ke udah.
“FELCRA Berhad ukai semina ngemajuka kebun bedandang besai tang mega ngemansangka struktur pengidup sosio- ekonomi pesereta ngagai tikas ti pemadu engkeman.
“Kelimpah ari ngagihka dividen ke diterima pesereta tiga kali setaun, FELCRA Berhad mega meri bantu sereta iring ngagai raban nembiak enggau pesereta ti bisi pengerindu dalam bidang pengawa dagang.
“FELCRA Berhad mega meri peluang pelajar kedua ngagai anak pesereta ti agi bisi lengerindu deka nampung pelajar ngagai renggat ti lebih tinggi nengah Kolej FELCRA,” ku iya.
Sama bisi datai ba pengerami nya, Menijar Besai FELCRA Berhad Menua Sarawak, Saifuddin Omar enggau ke bukai.