Sarawak ulih nyadi pengeksport vanilla ke menua luar DAP Sarawak minta perintah nengah Opis Pengawa Betanam Betupi Sarawak beratika penau kebun vanilla di nengeri tu

KUCHING: Perintah Nengeri nengah Opis Pengawa Betanam Betupi Sarawak (JPS) dipinta beratika penau kebun vanilla di Sarawak.

Kaban Kunsil Nengeri ( ADUN) Pending Violet Yong madah Parti Tindakan Demokratik (DAP) Sarawak minta pansik enggau pemansang ( R& D) digaga, ngambika ulih ngaga Sarawak nyadi nengeri nyadi pengeksport Vanilla ngagai menua luar.

“Nya alai, kami minta Perintah Nengeri ngaga R&D pasal bekebun vanilla di Sarawak,iya nya ngaga industri vanilla tu sebuah industri kebun bedandang besai, lalu ulih dieksport ngagai makit luar,” ku Yong madah ba aum media ti digaga di Indu Opis DAP ditu, kemari.

Iya nandu baru madahka Sarawak nengah JPS tau nguji industri vanilla tu, lalu pemerat kediatu begunaka bantu ari Perintah Nengeri nengah chara nyendiaka tanah alai bekebun vanilla, meri subsidi sereta ngena teknologi moden bekebun vanilla.

“Lalu nangkan nya, nyangka ulih ngaga polisi bakani deka meransang orang bumai bukai nguji bekebun vanilla, lalu mantu sida iya eksport vanilla nya ngaga menua luar.

“Aku pechaya semua bantu bansa tu ari Perintah Nengeri, ulih ngangkatka pemansang pengawa betanam betupi ngagai renggat ke tinggi agi.

“Sayau pemayuh tanah kitai di menua tu, enda dikena eng- gau gaya mua hari ke manah endar ulih alai bekebun vanilla, tang enda di ambi ulih enggau naka iya, lalu nambah enggau nya, rampa menua kitai sigi ngipak alai bekebun vanilla,” ku iya, lalu nandu baru madahka chara pemansang pengawa betanam betupi kitai di menua tu agi ngena chara lama.

Yong ke bechuntoka siku orang bekebun vanilla, Liew Kuet Kong, madahka (vanilla pods) dijual dalam USD600 sekilogram, iya nya seratus kali ganda untung agi ari lada burak, sereta seribu kali ganda untung ari sawit.

“Vanilla berega endar, enti dibanding enggau lada burak, seratus kali ganda untung agi, enggau sawit ke seribu kali ganda untung agi,” ku iya.

“Beratika untung datai ari vanilla nya mayuh, aku ngarapka Perintah Menua ulih beratika pekara tu laban vanilla ulih nyadi kebun ke besai sereta mai penguntung ngagai ekonomi menua sereta orang bumai,” ku iya.

Bulan Disember 2017, Yong bisi mai Menteri Muda Pelajar enggau Teknologi Dr. Annuar Rapaee ngelawa kebun vanilla di Moyan (Batu Kawah) lalu mai iya betemu enggau sida ke bekebun vanilla, ke bisi madah ngagai iya pasal bekebun vanilla.

Dalam bulan November 2017 ( maya aum Kunsil Nengeri), Yong mega bisi mai sida ke bekebun vanilla betemu enggau Sapit Kepala Menteri ti mega nyadi Menteri Betanam Betupi Moden, Tanah Adat sereta Pemansang Menua Pesisir, Datuk Amar Douglas Uggah madah ngagai iya (Uggah) pasal vanilla sereta penguntung ke di ulih ari vanilla.

“Ngarapka pungkal pasal bekebun vanilla tu, deka dikemeratka Perintah Menua nengah JPS,” ku iya.

Naka kediatu, entara penanggul ke ditapi ulih sida ke bekebun vanilla nya, sida iya sigi landik bekebun vanilla, tang enda nemu bakani ke chara eksport vanilla ngagai menua luar.

“Proses sigi tusah mimit (kediatu)enti enda dibantu ulih Perintah Menua laban ditapis ulih mayuh ijinsi, lalu penanggul kedua, iya nya bakani deka eksport vanilla nya,” ku iya lalu madahka di Kuching aja, urung 10 pekebun vanilla.

Rega vanilla di makit domestik manggai urung RM10 ke siti (vanilla pod).

VANILLA BISI PENAU: Dr. Annuar (kanan)mendingka penerang ari Liew (kiba) sereta disempulang ulih Yong (tengah) pasal kebun vanilla.

KAMI MANTAH : Alexander (duduk tengah) begulai enggau bala kaban Serakup Tuai Rumah Beluru Marudi mantah perambu muka ladang sawit ngatika diri ari PPNS di kandang Sungai Laong, Beluru, Marudi rambau aum pengarang berita, apin lama ke udah.