Mayuh perengka guna penanda jalai projek Pan Boneo dichuri
KUCHING: Mayuh perengka guna iya nya penanda jalai ke diengkah kunteriktor ba kandang projek ngaga jalai Pan Borneo di menua tu kena churi ngujungka nyadi entara kebuah jalai alun nya enda likun sereta bisi nyadi kes bebadi ba sekeda endur.
Direktor, Opis Pengelikun Jalai Alun (JKJR) Menua, Davina Agnes Enteli madahka kompelin ari kunteriktor bisi madahka penanggul nya bisi sigi nyadi ba sekeda kandang projek.
Ku iya, ke nyadi tagit penchuri, iya nya lampu kekelip, pengadang plastik sereta papan tanda ke bekaki aluminium tauka besi.
“Perengka guna ke meri tanda pengelikun sereta penerang ngagai penguna jalai alun ke di engkah ke pengelikun deriba di sekeda jalai alun Pan Borneo ke benung digaga, suah endar kena churi, lalu tiap kali diganti baru, kena churi baru,” ku iya madah lebuh dikerandau kemari.
Davina madahka entara projek ke napi penanggul, iya nya jalai alun di Batu 11 datai ngagai Batu 15, Jalai Kuching-Serian.
Iya madah, jalai nya nerima mayuh ripot ari pengguna jalai alun bekait enggau sukut pengelikun ke enda berapa manah kelebih agi maya malam hari.
“Mayuh kompelin ke di- terima bekait enggau projek ngaga jalai Pan Borneo, ba sitak jalai nya, nyangka endur tauka jalai nya alai trafik ke mayuh.
“Tang, penanggul ke bechurika perengka guna meri jaku lalau tauka pemadah nyadi pemerat penanggul tu, lalu ukai salah kuntriktor,” ku iya.
Bepelasarka pekara nya, iya ngelalau kunteriktor ke gaga projek jalai Pan Borneo kelebih agi di jalai trafik ke mayuh, ngambika sida iya seruran nitihka Perambu Ngemutarka Trafik, kena beratika ari sukut pengelikun ke mensia mayuh.
Kelimpah ari nya, Davina madahka kompelin bukai ke diterima ke seruran didinga, iya nya ba orang ke mutarka trafik tauka dikumbai ‘flag man’ ke enda landik.
“Enti nitih, ‘flag man’ tu udah dilatih ulih polis bakani ku chara nguntrul pejalai trafik, tang enda muntang ba sida tu kelebih agi ba sitak jalai ke enda likun,” ku iya.