Peranak Marudi diperansang meri sukung ngambi BN menang besai

MARUDI: Peranak Marudi dipinta beserakup sereta meri sukung ngagai Barisan Nasional (BN) maya Pengawa Bepilih Besai (PRU) ti deka datai, dikena nentuka BN ulih menang enggau majoriti besai.

Majoriti besai agi retika pinta rayat deka kering agi didinga perintah enggau bala ketuai, ngambi peminta projek mit kitai muntang agi dikemendar.

Pia mega rayat dilalau begempung sereta segulai, enda ibuh saru penemu enggau pangan diri, dataika kitai charut, anang nyadung berita bula sereta badu agi ngereja ulah ti enda manah.

Jaku tangkan tu datai ari Menteri Muda Kaunsil Kandang Menua, Datu Dr.Penguang Manggil lebuhka bejaku ngelancharka jalai genturung pendiau di Rumah Tuai Rumah Kaunsilor Suring Jelian, di Sungai Bain, Tinjar Baram kena pagi Hari Enam tu tadi.

Seraya ku iya, bala ketuai raban bansa patut nambahka sekeda penemu enggau mayuh agi tanya, belajar ari sekeda ejensi perintah, belajar ari mensia mayuh, kaul enggau orang bukai ba ekonomi sereta mega atur gawa ti beguna endar. Kena memanah awak enggau rentayan gawa ke bisi diatu.

“Setaun lapan bulan udah gawa nyadi kaban Kunsil Nengeri (ADUN) ditu, nyauka 200 buah rumah panjai udah diabas aku, nerima timbal chukup manah, lalu aku empu ulih beratika isu enggau penanggul ditapi tetiap genturung pendiau, seraya merambu nama pengawa ke patut digaga udah tu.”

“Nya alai, berita selebubu ngapa enggau propaganda politik di media rama diatu, mayuh agi ari menua bukai, ukai ari sitak N76. Sida ti begedika politik patut ngetu.

“Ketuai raban bansa patut anang nerima berita bula sereta ke bukai, bala kita patut betanya dulu ngagai pengari kita, baka pengari rayat, pemancha enggau penghulu,” ku iya.

Ba lansa ke bukai, Penguang mega merambu tetiap rumah panjai numbuhka Komiti Volunteer Bomba (Sukarelawan Bomba) lalu iya meseti bekerejasama enggau Komiti Pemansang enggau Pengelikun Genturung Pendiau (JKKK) kelebih agi sida ke jauh ari pasar.

“Seruran gawa begulai enggau raban Bomba, patut nerima latih ari Bomba lalu iya deka minta Opis Bomba ditumbuh di Pasar Lapok.

Penguang deka nyuaka surat chiri mangku pengawa ngagai 24 iku tuai rumah kena 20 Januari tu ila di Rumah Jarau lalu tu ungkup sida ti patut diberi surat chiri mangku pengawa.

Berebak enggau program nya, Penguang udah nyuaka geran penyampau RM25,000 ngagai JKKK rumah Suring, RM25,000 ngagai JKKK Rumah Douglas Bungan, Sungai Bain Baru, JKKK Rumah Jemat, Sungai Sebatu RM20,000 enggau Serakup Apai Indai enggau Pengajar (PIBG) Sekual Primari (SK) Sungai Bain, RM10,000.00 sereta RM13,000 ngagai Rumah Pong Imbap, Sungai Ampun Tinjar .

Penguang mega bisi nyuaka tiga bup ngagai SK Sungai Bain ari Tun Jugah Foundation, Bup Rentap, Warrior, Legend and Enigma enggau Dictionary ‘A comprehensive Iban-English Dictionary’ ari Dayak Cultural Foundation.

Antara bala ke bisi datai Sekretari Politik Kepala Menteri Alexander Asing Sadai, Chairman MDC Edward Mendai, Datin Monica Ukong Jaya enggau SAO Marliney ari Opis Pelilih Beluru, Penghulu Buan Gelungan.