Servis Khas JBPM meri bantu ngagai komuniti sebarang maya
BETONG: Kelimpah ari mantu mutarka penusah bah, penusah ngenyit sereta angus, Opis Bomba enggau Penyah Penusah Malaysia (JBPM) mega bisi enggau dalam Servis Khas dikena mantu komuniti ti begunaka bantu.
Nitih ku Pemesai Operasyen, Opis Bomba enggau Penyah Penusah (BBP) Betong, sida seruran nyikap diri mantu komuniti nadai ngira jam enggau endur.
“Kami seruran sedia ba sebarang pekara ke nyadi, nadai ngira endur enggau jam, meri servis pemadu manah ngagai komuniti begunaka bantu.
“Dua kangau ngenyit mantu Servis Khas bisi diterima kemari, muai serangan gamang enggau indu manyi,” ku iya.
“Servis Khas keterubah dipejalai di Sekula Primari (SK) Ulu Lemanak, Lubok Antu iya nya di kuarters pengajar di sekula nya.
“Raban pengatur pengawa sekula minta muai serangan indu gamang ti majak besai di dinding rumah, dikenangi tau ngeruga pengelikun sida ke diau dia.
“Bisi empat iku raban bomba bejalaika Servis Khas nya nyembur ngena ridset munuh indu gamang sebedau muai serangan nya,” ku iya.
“Berebak enggau nya, raban ke sama mega bisi ngesah ngagai Flat Kediaman ICS Imigresyen di Lubok Antu besemak enggau garis entara menua Indonesia untuk muai serangan indu manyi.
“Kami bejejimat laban serangan indu utai nya ba ringkat empat flat endur diau pemesai Imigresyen.
“Kami mega nyembur ngena ridset muai serangan nya,” ku iya nambah.