Komuniti China patut beserakup enggau pangan diri
MARUDI: Komuniti China ditu dipinta beserakup sereta gawa begulai enggau pangan diri lalu anang sesekali nempa cherita bula entara komuniti sida empu. Gawa beraban tauka ngati kediri lalu putarka semua isu ti tau ngasuh charut sereta begedika pangan diri.
“Aku ngelalau komuniti China ditu ngatur sebarang pengerami makai lemai, ambika chunto ba keterubah iya, diatur Serakup Hakka lalu ari nya nesau sereta ngangauka semua kaban serakup China ditu sereta mega dientudika serakup ke bukai.
“Tu chara serakup sereta nampa komuniti China begulai gawa rat agi enggau pangan diri. Maya ngintu Taun Baru China ti deka datai, gusung bala bakih kita sereta anang ingatka isu lama ti kala nyadi antara semua kita.”
Datu Dr. Penguang ke nyadi Menteri Muda Kaunsil Kandang Menua madah ngagai pengarang berita pengudah ngetuaika Randau Antara Komuniti China ke diatur di bilik aum Kaunsil Pelilih Marudi (MDC), ditu, kilah ensana.
Sebedau randau berengkah diatur, Datu Dr.Penguang ke mega Kaban Kunsil Nengeri (ADUN) Marudi udah nyuaka chek geran Projek Mit Pemansang Menua Pesisir (MRP) enggau Program Transformasyen Menua Pesisir (RTP) ari Kepala Menteri.
Antara penerima geran iya nya Kunsil Direktor Sekula Primari Bansa China (SJK) Chung Hua penyampau RM637,340 ke diberi ari Kepala Menteri Datuk Patinggi Abang Johari Tun Openg, Gerija Sidang Injil Borneo (BEM) Marudi RM10,000, Gerija Methodist Marudi RM10,000, Gerija Anglikan Marudi RM10,000, Unit Saberkas Pasar Marudi RM10,000, seraya ungkup projek RTP taun tu, iya udah ngemendarka penyampau RM140,000 ngagai Gerija Good Shepherd dikena nge- manahka begunan enggau pekara ke patut.
Agihbelanjatuudahdikemendar rambau Pengerami Mantar Krismas apin lama ke udah.
Ba lansa ke bukai, penerang baru pasal projek ti udah dikemendarka iya, enggau skop kepenudi Dinding Penekat, 218 meter pemanjai beungkus RM9.36 juta sereta mega RM8 juta ari Opis Kereja Raya (JKR), Tebing Sungai deka ditinda nyangka dalam pengujung bulan Januari tauka pun bulan Febuari 2018, ke alai bayar pampas ba projek tebing sungai udah diagihka penyampau RM6 juta.
Penguang mega bisi nyebut gaya Jalai Marudi – Miri kandang diatu laban musim pengujan.
“Pagi kemari, bisi beberapa iku injinir JKR udah gawa kia matau pengawa ke patut digaga udah tu laban aku ngasuh sida ngiga sebarang jalai pemutar dikena ngemanah sebedau Pengerami Taun Baru China lalu deka ngangkatmanahka iya.
“Nya kebuah, CMS deka bejalaika projek tu sebedau Pengerami Taun Baru China. Bepelasarka penanggul tu, aku seruran deka berandau enggau Injinir JKR Miri nanya gaya jalai sereta penanggul bukai ti enda disadang nyadi,” ku iya.
Dalam randau nya, manah endar batang pekara ti dipejuraika bala ketuai Komuniti China, antara sida empu, lalu tu nyangka randau keterubah iya.
Antara bala ke bisi datai ngulu randau nya Pemesai Pelilih Marudi Mackos Sibong, Chairman MDC Chairman Kaunsilor Edward Mendai, Pemancha Chong Chin Hui sereta semua chairman serakup China ditu.
Rambau atur randau nya, iya nerima sebana ari mayuh ketuai komuniti China pasal penanggul ditapi sida ditu sereta ngaga sekeda perambu ba pemansang ke patut dipejalai.