Malaysia bisi penau nyadi pengeksport sarang lelayang
MUKAH: Malaysia bepenau nyadi pengeksport besai sarang burung lelayang ke China enda lama agi.
Menteri Betanam Betupi enggau Industri Pun Betanam Dato’ Sri Ahmad Shabery Cheek madah, proses randau antara kededua menua udah datai ba tikas kepenudi.
“Randau antara Malaysia enggau China pasal sarang burung lelayang udah datai ba tikas kepenudi lalu kitai ngarap dalam beberapa bulan agi iya deka nyadi nyata,” ku iya nengah aum media bepalan ba Kingwood Resort Mukah, apin lama ke udah.
Sebedau nya, Shabery bisi limpang ngabas sekeda palan sarang burung lelayang lalu mega nyadi palan ngumpul enggau injin.
Malaysia ku iya benung eksport 60 tan sarang burung lelayang setaun tang ngembuan penau ngemansutka urung 400 tan setaun.
Pendiau tu ku iya bepun nengah jalai eksport ke kurang landik lalu semina ngerugi bala pengemeran.
“Mayuh dieksport ke menua baka Hong Kong, Vietnam enggau mega menua-menua bukai tang pengujung iya produk sarang burung tu mayuh agai China,” ku iya.
Iya pechaya nengah pemu- jur aum nya ila, bala pengemeran deka bulih rega ke manah sereta numbas.
Ngelansa pasal penanggul bala pengemeran ti sebana pasal ke churi sarang lelayang lalu orang ke salah semina nerima ukum ke lempung, iya madah deka mansik atur enggau undang-undang nengah akta pengelantang jelu.
“Kitai deka mansik akta nya lalu nyema chukup bukti mandangka kes enchuri nya bekaul enggau menyati jelu, nyadi ukum berat deka dititih,” ku tandu iya.
Sama bisi datai Sapit Kepala Sekretari ( Polisi)/ Ketuai Pemesai Pemadah ( CIO) Dato’ Mohd Salehhuddin Hassan, Chairman Agrobank Tan Sri Mohamad Zabidi Zainal enggau Kaban Kunsil Nengeri Tellian Yussibnosh Balo.