Bantu ari JKM bepanggai ngagai penusah penerima semua pupu bansa di nengeri tu
SIBU: Bantu ari Opis Pengintu Pengelantang Pendiau Raban Bansa (JKM) bepanggai ngagai penusah penerima lalu ungkup semua bansa di nengeri.
Menteri Pengintu Pengelantang Pendiau, Pengelantang Komuniti, Indu, Ruang Bilik enggau Pemansang Anak Mit Dato Sri Fatimah Abdullah nyemetak madah bantu pengelantang pendiau ke diberi ngagai sida nya nadai ngira penatai enggau pengarap.
“Perintah seruran beratika pengelantang pendiau rayat sereta ngelempungka tating belanja sesiku orang tauka ruang bilik ke kurang pemisi,” ku iya.
Fatimah madah munyi nya rambau bejadika Seminar Pengelantang Pendiau diatur Gerempung Apai Indai enggau Pengajar (PIBG) Sekula Sekondari (SMK) Methodist, ensanus.
Dulu hari nya, Fatimah madah Sarawak ngembuan 20,384 pintu ruang bilik ke idup kelalu seranta enggau 40,187 pintu ruang bilik seranta nitihka statistik orang seranta e-Kasih.
Ku iya, penatai pemisi ruang bilik RM660 sebulan dikategorika kelalu seranta, udah nya penatai pemisi RM990 sebulan agi dikategorika seranta.
“Urung 57,676 pintu ruang bilik udah dipansutka ari tikas seranta lalu nengah penatai pemisi sida ngelui Penatai Pemisi Tikas Seranta (PGK) naka Januari taun baru,” ku iya. Berebak enggau nya, Fatimah madah, program pengerami ‘Sejambak Kasih’ diatur JKM endang diatur maya musin pengerami lalu semina diatur ba Sarawak.
“Tu betuju ngelempungka tating belanja sereta meri pengaga ngagai raban penerima beserimbai enggau pengawa nyambut pengerami,” ku iya.
Fatimah ke mega Kaban Kunsil Nengeri ( ADUN) Dalat bisi ngenataika bantu tumu besekula ngagai nembiak SMK Methodist.
Ba pengerami ke sebaka, iya mega bejadika pintu tama ngagai empat sekula dipelanja PIBG sekula lalu nya deka ngemuntangka nembiak ke datai Jalai Hua Khiew, Jalai Tiong Hua, Lorong Lajong enggau Lorong Laichee.
Jalai tama nengah palan baru nya mega ngemuntangka nembiak, sida nadai ibuh agi bejalai jauh.
Sama bisi datai Chairman PIBG Ting Wei Ping, Chairman Kaunsil Pengatur Sekula Ting,Chairman Alumni Alice Wong enggau Prinsipal Yong Choo Tiong.