Nembiak pelajar khas enda patut dikemelu, ku Teng

SARIKEI: Semua piak patut bejalaika tanggungpengawa ke patut dikena nentuka raban nembiak enda dikemelu ari arus pemansang pelajar menua.

Sistem pelajar khas patut mudah diterima, dikena nyapai misyen enggau visyen lalu meri peluang pelajar ngagai raban nya nyapai pemandai ke diulih diri.

Sekretari Politik Kepala Menteri Teng Ung Woo madah, reti enggau konsep pelajar khas iya nya pelajar ke disedia ungkup nembiak ke nyelai pendiau.

“Sida nyengkaum raban ke bisi penanggul meda, mending, belajar sereta lubah nangkap runding.

Iya madah munyi nya ngagai media pengudah ngatur pejalai sereta nemuai ngagai kelas nembiak pelajar khas ba Sekula Primari (SK) Abang Haji Mathahir, semalam.

“Atur reti baru nembiak ti nyelai pendiau ngemeratka penau, tuju, pengelandik, pemansang enggau jalai nembiak.

“Nya alai, falsafah pelajar khas ba Malaysia endang pengawa betampung dikena nepa mensia ke landik, bisi tuju, ulih ngereja utai, mereti, ulih gawa kediri, nemu ngaga perambu kediri nyadi orang ke produktif seriris enggau Falsafah Pelajar Menua,” ku iya.

“Kitai patut nemu tanggungpengawa dalam meri pelajar ngajar raban tu ukai semina tanggungpengawa raban pengajar tang mungkur semua piak.

“Kitai andal nengah kerjasama enggau komitmen semua piak, deka ngujungka juluk enggau tuju pelajar ungkup raban tu ulih nyapai pekara ke diselinting,” ku Teng.

Penatai Teng ba sekula nya dikelaluka Kepala Pengajar, Hishamudin Gimin sereta raban pengajar ke bukai.