Tikas pengelikun kandang tekat Bakun dikemerat

KUCHING: Tikas pengelikun ba kandang tekat Bakun ba menua pesisir adap tengah Sarawak dikemeratka nengah atur ngasuh seraban Polis Tasik gawa ba kandang tekat nya bepun taun tu.

Komander Raban Polis Tasik (PPM) Wilayah Lima Sarawak ACP Salehuddin Mat Zaman madah tim nya nyengkaum siku pemesai enggau enam staf dianjung gawa ba kandang nya bepun bulan tu, ngambika kandang nya seruran dipatau sereta dikemataka begintir ari PPM..

Iya madah penatai PPM deka ngenegap agi sukut pengelikun ba tekat nya lalu diatur dikemataka raban polis pemantu.

“Sukut pengelikun enda ulih dipelita ba kandang nya ti alai ngengkahka keresa ke beguna menua tu, tikas pengelikun patut seruran dikemerat,” ku iya madah ngagai pemberita pengudah ngulu gempuru ninting bulan polis tasik Kandang Lima ba indu opis raban nya ditu kemari.

Ku iya, PPM deka mantu ba sukut meresa sereta matau kandang tekat nya ke tusah dilawa nengah jalai darat.

Salehuddin udah nya meri terima kasih ngagai semua piak ke bisi kaul baka ngatur pengawa enggau unit pengelikun tekat Bakun sereta Kaunsil Sungai- sungai Sarawak, ke udah mayuh mantu ari sukut logistik baka nyendiaka palan diau engagu opis sementara pontoon ( jelatung melepung) endur ngengkahka keresa PPM.

Dulu ari nya, ba jaku iya dia iya madah sepanjai taun siti ke udah PPM Wilayah Lima udah mutarka 565 kes salah bekaul enggau bidang kuasa sida dibanding 421 ba taun sebedau nya.

Ku iya, iya chukup temegah enggau japai sereta rikod manah dipandangka PPM Wilayah 5 taun nyin kemari, ke udah nyapai tikas selinting Indeks Rikod Besai ( KPI) ke udah diletak ungkup Komander Raban Polis Bukit Aman.

Gempuru nya mega bisi diatur PPM Wil 5 nyuaka 12 surat basa ngagai orang ke mayuh mantu dalam ngemujurka agenda PPM, sereta tujuh ari tujuh penerima nya raban media. — Bernama