M’sia nadai nyual menua ngagai China
KUCHING: Atur matak pemeranakka puku ari menua China ngaga dagang di menua tu ukai ketegal Malaysia deka dijual ngagai China, ku Menteri Pengeraja Asal enggau Rampa Menua Dato Sri Wan junaidi Tuanku Jaafar.
Berindik enggau nya iya nyangkal tuduh sekeda orang kelebih agi raban penyakal ti madah reta ( tanah) di menua tu majak mayuh diempu China.
“Interaksyen kitai enggau menua China chukup besai. Pengawa dagang enggau menua nya manggai beratus bilion ke alai China udah nyadi kaling dagang besai Malaysia.
“Tajapia aku mengkang madah kitai ukai deka nyual tanah di Malaysia ngagai China. Ke amat penyampau puku ke diperanak China di Malaysia semina ba penuduk lumur 11,”ku iya.
Wan Junaidi mansutka jaku nya ba aum pengarang berita di Kuching kemari.
Ngenang kaul ke sama, iya madah puku ke pemadu besai datai ari Singapura, Amerika enggau Eropah.
Ku iya ke mega Kaban Parlimen Santubong, Singapura udah dulu beranakka puku di Malaysia lalu Amerika udah dulu bepuluh taun ke udah.
“Ketegal nya tuduh sekeda orang salah. Maya kitai mai pemeranak puku ari China beranakka puku, ngaga projek di Malaysia, pengawa nya dikumbai sida deka ngambi tanah menua tu.
‘Nadai kala sida nuduh Singapura enggau Amarika deka ngambi tanah di menua tu. Semua tu main politik sekeda orang lalu aku nga- rap enda nusutka runding rayat,’ku iya.
Perintah ku Wan Junaidi ukai semina meda penyampau duit aja ba atur matak pemeranak puku ari menua luar.
Pekara bukai baka ke pengulih nembuka projek sereta ungkus projek ke mit entara pekara ti dikemerat.