Anang nengah jalai Ngemah-Song-Kapit
KUCHING: Sapit Kepala Menteri Tan Sri Dr James Jemut Masing ngelalau mensia mayuh enda mai perengka pengangkut betengahka jalai Ngemah-Song-Kapit ketegal jalai nya bedau tembu digaga.
Ku iya ke mega Menteri Pemansang Infrastruktur enggau Perengka Pengangkut, jalai ke bedau tembu digaga nya entara Kanowit enggau Song urung 14 km pemanjai iya nya di Ng Ngungun enggau Temalat.
Masing nyamin jalai ke beungkus RM150 juta nya disadang tembu dalam timpuh 3 taun pengudah nerima agih belanja ari Perintah Besai.
“Berindik enggau nya aku ngarap mensia mayuh ulih nganti dulu laban kitai nguji nembuka jalai nya dalam timpuh 3 taun.
“Ketegal jalai nya mengkang digaga, sebarang penusah ke tau nyadi deka enda dibayar insuran. Anang ngemedis nyawa diri,’ku Masing kemari.
Ngenang kaul ke sama Masing ke mega ADUN Baleh madah Jalai Sibu ke Kapit ke ba pemanjai 102 km deka tembu digaga dalam timpuh 3 taun.
Dalam timpuh lima taun ku iya, Palan Tekat Ai Baleh(HEP) deka disambung enggau jalai alun ba pemanjai 120 km ari pasar Kapit.
“Reti nya dalam timpuh lima taun ti deka datai, jalai alun ke udah dibelakin ari Sibu-Kapit-Ulu Baleh HEP ke pemanjai 230 km deka tembu digaga. Tu deka mai pemaik ngagai peranak ke diau ba lebih 100 buah rumah panjai, sekula enggau klinik.
“Aku ngarap jalai tu ukai semina deka nyambung sida ngagai pasar tang mega deka meri awak sida ngemansangka tanah NCR,’ku iya nambah.
Iya mega ngarap penyakal badu agi nyalahka perintah ketegal semua infrastruktur nya udah disedia ungkup sida ngangkatka pengidup diri.
Masing netapka belanja dikena ngaga jalai pemanjai 230 km nya manggai RM5 biliun.
Projek mungkur pengawa ngaga lima jematan besai meraka sungai Kanowit, Katibas, Baleh, Mujong enggau Sg. Merirai.
Jematan Kanowit, Katibas enggau Baleh udah tembu digaga ke alai pengawa ngaga jematan Mujong enggau Merirai bedau dipungkal.