MPP dipinta meri penerang bekaul enggau siku ukui ke nadai temu kini penungga

KUCHING: Pemenggi jelu tupi Queennie Cheng, 34 taun,minta piak Veterinar Sarawak ( DVS) enggau Kaunsil Mengeri Padawan (MPP) meri penerang bekaul enggau status jelu tupi iya.

Iya madah, udah puas nguji dalam timpuh 48 jam deka nemu status bekaul jelu tupi iya nya, siku ukui bansa Pitbull diberi nama Clinton beumur 1 taun 10 bulan dijangka diambi PBT maya operasyen anti rabies di Batu Kawah kena 17 Januari tu tadi.

“Nyema kita orang ti sayauka jelu, tentu kita nemu baka ni asai ati aku... aku enda nemu nama penyadi ukui nya ke suah nguluka aku tinduk.

“Nyema kita ngasaik nasit sebaka enggau aku diatu, enda patut kita enggai nemu kini penungga iya ke lenyau pia aja?,” ku iya bejaku ngagai pemberita rambau aum media ba opis Parti Tindakan Demokratik (DAP) ditu kemari.

Queennie enda nemu penyadi ukui nya laban maya nya iya udah nurun ngelawa bala ti bisi pengerami kahwin urung pukul 11.32 pagi, 17 Januari nya.

Iya ditemu aku, Clinton udah dirantai ba kandang rumah lalu enda patut iya pansut ari rumah.

Taja pia pengudah datai urung sejam udah nya, iya nadai agi meda Clinton ba endur nya lalu mupuk ngiga ba endur besemak nyentuk ke malam.

Enda lama udah nya ba hari ke sama, Queennie dipadahka orang sepiak rumah, Mirabella Chin bisi nganjung video Clinton ngagai telefon binching iya lalu terus ngelawa DVS malam nya.

Pengudah datai, iya dipadahka Pemesai ke gawa nguji ngiga Clinton tang nadai temu, dia pemesai nya ngasuh iya ngelawa MPP hari siti.

Tang pengudah digiga agi bedau temu laban pemesai PBT nya madah meseti betanya ngagai orang ke lebih bekuasa.

Naka pukul 11.22 malam siku ari sida Queennie sebilik, Michelle Pui dipadahka nengah Whatsapp, Clinton nadai ba MPP lalu diasuh sekali agi ngelawa DVS awak ngiga ukui nya.

“Nyema amat ukui aku udah dituchuk begulai enggau ukui bukai ngambika iya parai... tulung padah beri peluang ngagai aku ngambi bangkai iya baru. Abis nadai aku ulih meda.

“Pekara chukup ngenyinu, taja ukui aku Clinton udah direjister ba MPP ngena lumur ID 099 tang agi end aulih giga? Manah agi aku enda ibuh masau duit ngerejister iya suba laban nyau digaga baka ukui bukai ke nadai orang ngempu.

“Berebak enggau nya, ngagai orang ke ngempu ukui nyangka nya Clinton kala munuh ukui sida... aku deka minta ampun,” ku iya.

Berebak enggau nya, Kaban Parlimen Stampin, Julian Tan madah jelu tupi ke ngembuan tag ID enda patut ditangkap nadai madah ngagai orang ke ngempu.

Ku iya tu mandangka jelu tupi nya ngembuan tag pengelala lalu ulih dikelala nengah rikod PBT.

Jaku tuduh madahka ukui nya udah munuh enam ukui bukai dba kandang rumah nya ditingkah iya lalu deka pekara dipansik silik.

Taja pia iya muji semua pengawa digaga PBT laban udah bebendar bejalaika pengawa mutarka kerekai penyakit rabies ba nengeri tu.