Seminar pengerai runding OUM udah digulu 65 iku staf opis ejensi perintah

KUCHING: Bisi 65 iku pengereja pengawa ari opis sereta ejensi perintah nyereta seminar ‘ Diskriminasi Kesihatan Mental Di Tempat Kerja: Cabaran Dan Solusi’ ditu, kemari.

Seminar nya diatur Universiti Terbuka Malaysia (OUM) Kuching, ba palan pelajar tinggi nya empu.

Pengelicha seminar iya nya Kunselor Organisasi Daerah, Opis Pelajar Pelilih Padawan, Veronica Peter Ballak Raggan.

Dalam jaku pengelalu, Direktor OUM Kuching Abdullah Borda madahka seminar nya sebengkah ari aktiviti ke diatur taun tu.

“Kebuah kami ngatur program baka seminar tu, laban tu sebengkah ari chara kami OUM meri pulai penguntung ngagai raban bansa,” ku iya.

Kelimpah ari nya, lebuh ke meri licha Veronica madahka penanggul pengerai runding ba endur gawa ketebal beberapa pekara ti ulih ngujungka orang sesiku nya tusut runding.

Iya madahka orang bisi penanggul ba pengerai runding begunaka orang sukung diri sebilik, bala bakih, bakih sama endur gawa enggau ke bukai.

“Bisi beberapa kebuah penanggul pengerai runding nyadi ba endur gawa iya nya tating kereja kurang ngambi bagi sereta dijaga ba endur gawa, dichiping, bisi laya enggau ke bukai.

“Pekara ti baka nya ulih ngeruga pengerai runding ke lalu oleh ngasuh orang sesiku nya diau diri, irau sereta tusut runding.

“Dikena ngurang sereta nyeliahka pengerai runding orang nya majak tekeruga, iya begunaka orang mendingka penanggul iya,” ku iya.

Lalu orang ke mendingka penanggul nya patut ngayanka ulah berat tauka ibuhka iya enggau ke bukai tang ke pemadu beguna anang nyerita penanggul diri sereta anang meri penemu dulu, ku iya.

“Ke pemadu beguna pendingka dulu orang ke bisi penanggul pengerai runding,” ku iya.