Sekula di Baram chukup ngelaluka bantu perengka ngajar enggau belajar
LONG LUYANG, Tinjar: Sekula ba menua pesisir ba Baram chukup ngelaluka pengawa meri bantu sebarang perengka dikena ngajar enggau belanjar.
Kaban Kunsil Nengeri (ADUN) Telang Usan Dennis Ngau madah, kelimpah ngelempung tating belanja apai indai enggau pengibun, pemeri nya nyadika peransang ngagai sida nganjun bala anak ngulihka pemandai ba sekula.
“Apai indai ba sitak menua pesisir nadai ngembuan penatai pemisi tetap sereta mayuh anak sida ke agi besekuka, nya alai bantu chukup beguna ba sida,” ku iya rambau nyuaka pemeri bantu besekula ari Yayasan MyKasih ba SK Long Loyang Tinjar ditu ensanus.
Iya muji penyiru gerempung pengelantang pendiau ari Kuala Lumpur nya ke udah nyuaka perengka sekula ungkup bala nembiak ba menua pesisir di nengeri tu.
Iya mega meri terima kasih ngagai Sapit Kepala Menteri Datuk Amar Douglas Uggah Embas laban udah ngasuh konstituensi Telang Usan alai ngemujurka projek nya.
Dua sekula bukai ke bela diasuh nyadi penerima iya nya SK Long Bemang enggau SK Long Luteng.
Taja pia, semina SK Long Loyang dikemendar nerima projek nya ke mungkur pemeri kantung sekula, baju sekula enggau kereban dikena nulis.
“Aku besemaya nyema dipejalaika taun tu, aku deka nentuka sekula bukai mega nerima bantu sebaka,” ku iya.
Dennis ngelalau penerima patut nyaga barang sekula sida enggau manah sekumbang ba sekula.
Iya mega ngarapka atur Yayasan MyKasih ditunda piak bukai datai meri bantu ngagai sekula ba ulu Baram.
Yayasan MyKasih ditumbuhka 2004 dikena mantu rayat ti tusah nengah pengawa meri barang pemakai, pelajar enggau latih. Iya udah mujur mantu lebih 233,000 ruang bilik sereta lebih 400 bengkah endur serata menua.
Sama bisi datai Kaunsilor Jaraw Braim enggau TK Long Luyang, John Avon.