Fasa kedua randau nagih hak dalam MA63 diatur sehari tu

KUCHING: Fasa kedua randau nagih hak Sarawak dalam Malaysia nengah Sempekat Malaysia 1963(MA63) deka diatur ila (sehari tu), ku Kepala Menteri Datuk Patinggi Abang Johari Tun Openg.

Iya madah randau fasa kedua nya bekaul enggau pekara undang-undang sereta mungkur pekara ke lebih besai.

“Nengah randau fasa kedua ke diatur ila, kitai deka ngambi hak kitai ke udah nadai dikembuan agi lalu nya nyengkaum adan kitai Sarawak ti bisi minyak enggau gis.

“Kitai deka nampung pengawa Niang Tok Nan,”ku iya rambau bejadi Aum Besai Delegit Zon 4 Parti Pesaka Bumiputera Bersatu( PBB) di Kuching kemari.

Iya ke mega Presiden PBB netapka randau fasa keterubah sentang pekara ke sama udah tembu diatur.

Ba randau fasa keterubah nya ku Abang Johari, Sarawak mulaika hak ba pekara undang undang ke alai kuasa diberi ngagai Luyar Menua(AG).

“Ari sukut pekara pelajar, kitai bisi kuasa lalu kitai di Sarawak enda begunaka UPU enti deka masuk universiti.

“Ketiga, kitai udah bisi komiti begulai ba hak ke dikunsi entara Perintah Besai enggau Sarawak,’ku iya.

Ngenang kaul bukai, Abang Johari madah Sarawak enda begunaka parti ari luar bejalai atur merintah di nengeri tu.

Ku iya semina parti ke tulin ke asal ari Sarawak aja ti ulih ngintu sereta ngemansang nengeri tu.

“PBB ke nyadi tiang Perintah Nengeri diatu nyadi parti ke ulih ngembing Sarawak.

“Kitai nguna chara baru lalu ba gempuru besai tu ila kitai deka mandangka PBB ngembuan atur merintah ke bekualiti ‘World Class’.

“Bejaku sentang teknologi kitai landik, sentang pekara wang kitai landik, sentang kuing jemah ila kitai landik lalu tu mih raban ketuai kitai,” ku iya.

Bela datai kededua Sapit Presiden PBB ari PESAKA enggau Bumiputera, Datuk amar Douglas Uggah enggau Datuk Amar Awang Tengah Ali Hassan, Ketuai Zon 4 ke mega Mandal Presiden PBB Datuk Julaihi Narawi enggau ketuai bukai.