Enam pampang PBB Zon 4 setuju resolusyen KM sah presiden parti
KUCHING: Semua enam pampang Parti Pesaka Bumiputera Bersatu ( PBB) Zon 4 setujuka resolusyen enggau penetap dia Kepala Menteri Datuk Patinggi Abang Johari Tun Openg sah nyadi presiden PBB.
Mansutka pekara nya, Ketuai Zon 4 ke mega Ketuai PBB pampang Sebuyau, Datuk Julaihi Narawi mega madah Zon 4 mega setujuka resolusyen enggau penetap diak pangku pengawa dua sapit presiden ke diatu disah.
Kededua penuduk sapit presiden ke diatu dipangku Datuk Amar Douglas Uggah ari PESAKA enggau Datuk Amar Awang Tengah Ali Hassan ari Bumiputera.
“Semua enam pampang PBB Zon 4 udah tem- bu baum lalu kitai udah setujuka resolusyen enggau penetap diak Kepala Menteri Datuk Patinggi Abang Johari Tun Openg sah nyadi presiden PBB.
“Kitai mega setujuka resolusyen enggau penetap diak kededua penuduk sapit presiden ke dipangku Uggah enggau Awang Tengah sah ba gempuru besai PBB ti deka datai,” ku iya.
Julaihi mansutka penrang nya ba jaku pengelalu rambau Aum Besai PBB Zon 4 ke diatur di Komplek Islam Sarawak ditu kemari.
Aum nya dipenyadi Kepala Menteri ke mega Presiden PBB Datuk Patinggi Abang Johari Tun Openg.
Zon 4 PBB diarika pampang Sadong Jaya, Simunjan, Gedong, Sebuyau, Lingga enggau Beting Maro.
Kelimpah ari nya ku Julaihi, pampang dalam Zon 4 mega setujuka resolusyen enggau penetap diak pangku pengawa ketuai Bagi Nembiak enggau Ketuai Orang Indu enda dipekit ba Gempuru Besai PBB ti d eka datai.
“Kitai mega nyukung pengeran Perintah nengah embing Abang Johari ngulihka kuasa ke patut diempu Sarawak nengah Sempekat Malaysia 1963 dipulai ngagai Sarawak.
“Kitai mega setuju diak PBB deka seruran mendingka pinta enggau peneka peranak ke nguan menua pesisir lalu nampung program ngemansang menua pesisir,’ ku iya.
Ku iya nambah, pengawa ngaga jalai tebing tasik meseti dipajak lalu mayuh agi genturung pendiau deka disambung nengah jalai alun ke manah.
PBB deka ngadu Gempuru Besai kena 8 nyentuk ngagai 11 Februari 2018 tu lalu disadang dipenyadi Menteri Besai Datuk Seri Najib Tun Razak.