Pekara tu udah nyadi isu ti berat dikena nentuka hak semua rayat Sarawak enda dikeruga sereta diulihka baru
KOTA SAMARAHAN: Kepala Menteri Datuk Patinggi Abang Johari Tun Openg agi deka majakka pekara bekait enggau Danji Malaysia 1963 (MA1963) ba mua Menteri Besai (PM) Datuk Seri Mohd Najib Tun Razak lebuh ngepunka Konvensyen Parti Pesaka Bumiputera Bersatu (PBB) di Palan Konvensyen Borneo Kuching (BCCK) ari 8 ngagai 11 Februari tu ila.
Abang Johari madah pengawa iya ngansak MA1963 nya diputar enggau jampat, sigi udah dipajakka ari exKepala Menteri sebedau tu, niang Pehin Sri Adenan Satem.
“Niang Pehin Sri Adenan deka ngambi kuasa kitai (Sarawak) ke udah lenyau nya ari Kuala Lumpur.
“Aku dikearapka nyadi kapten tim Adenan begulai enggau raban kami di Barisan Nasional (BN) bukai, lalu pengawa aku majakka pengawa Tok Nan (Pehin Sri Adenan) lalu pekara tu (MA1963) deka dibantaika aku maya bejaku ba Konvensyen PBB tu ila (8-11) maya PM bisi ditu,” ku Abang Johari.
Iya madah munyi nya lebuh bejaku bejadika Aum Penyereta Tiga Taun Sekali Pampang Parti PBB Zon 2 (N9. Padungan, N10. Pending, N. 11 Batu Lintang, N. 12 Kota Sentosa, N. 12 Batu Kitang, N. 14 Batu Kawa, N.15 Asajaya, N.16 Muara Tuang enggau N.17 Stakan) di Dewan Suarah Kota Samarahan ditu, kemari.
Abang Johari ti mega nyadi Presiden PBB sereta chairman BN Sarawak madahka, iya deka baum enggau Attorney General bekait enggau aum teknikal MA1963, lalu dipelabaka pekara tu deka diputarka dalam kandang berapa bulan tu ila.
“Aku deka majakka aum pasal MA1963 tu, nyengkaum ngelalau PM baru pasal pekara tu,” ku iya.
Abang Johari nandu baru nusui pasal penumbuh Malaysia kelia, alai siku ari pengari Sarawak enggau ba sejarah Sarawak enggau Sabah begulai enggau ngempung Malaysia lebuh nya, niang Tun Jugah di padah Abang Johari orang ke ngembuan runding sereta penemu ke ‘tajam’.
“Apai Jugah siku orang ke ngembuan untak tauka penemu ke ‘tajam’. Maya kitai (Sarawak) enggau numbuhka Malaysia, niang Tun Jugah kala madah ngagai pemesai ari Kuala Lumpur sereta London.
“Ku niang Apai Ju- gah, anang Malaysia tu ila nyerumba tebu, manis ba pun, udah nya ila, tabar ba ujung.
“Taja pan niang Apai Jugah enda nemu nyain tang penemu iya ‘ tajam’ laban iya ulih ngila gaya dudi hari tauka jemah ila, penanggul ke deka ninggang Sarawak,” ku iya.
Tu ke nyadi penanggul kitai di MA1963, danji nya manis, tang kitai enggai ujung nya tabar, ku Abang Johari.
“Niang Pehin Sri Adenan udah meda penanggul tu deka datai, nya kebuah iya ngelaika 22 Julai nya, Hari Sarawak Merdeka, ngambika enda ‘tabar’ ba ujung. Diatu, kitai nyambung pengawa niang Adenan enda tau enda dipajakka. Pemesai kitai, Apai Jugah, Tun Rahman ngatur strategi nyemelaka pekara politik, Tun Taib mega bisi chara iya empu, lalu aku deka nyambung pengawa sida iya,” ku iya.
Niang Pehin Sri Adenan deka ngambi kuasa kitai (Sarawak) ke udah lenyau nya ari Kuala Lumpur. Datuk Patinggi Abang Johari Tun Openg Kepala Menteri