Pakatan Harapan seruran nerima sukung penuh ari Tun Mahathir
SIBU: Pakatan Harapan (PH) diatu ba tikas ti lantang sereta kering agi bepun ke nerima sukung ari Tun Mahathir Mohamed.
Mandal Presiden Parti Keadilan Rayat ( PKR) Sarawak Ali Biju madah, sukung tu nejuka piak sida deka mujur agi enti dibida enggau suba.
“Ukai kitai nyukung Mahathir tang iya nyukung kitai diatu.
“Kitai enda nyukung iya maya iya ba UMNO suba tang diatu iya nyukung tuju penumbuh parti kitai.
“Nya alai, diatu kitai meda awak (menang bepilih) deka tampak agi nambahka Tan Sri Dato Muhyiddin Yassin mega bisi enggau kitai,” pia ku iya madah maya nya.
Iya mantaika jaku tu maya ngari Presiden PKR Sarawak Baru Bian ba Konvensyen Keterubah Pakatan Harapan Sarawak (PH) enggau Pengawa Bejadi Manifesto PH Sarawak ba Paramount Hotel ditu, kilah ensana.
Pengawa tu bela digulu Sapit Presiden Pakatan Harapan (PH) Nasional Tan Sri Dato Muhyiddin Yassin sereta bala bukai ba PH baka Sapit Presiden AMANAH Salahuddin Ayub, Sekretari Besai Parti Keadilan Rakyat (PKR) Dato Saifuddin Nasution Ismail, Sapit Chairman PH Kebangsaan ti mega Chairman PH Sarawak Chong Chieng Jen sereta Sapit Chairman PH 1 Sarawak Baru Bian.
Nambahka jaku iya, ku Ali, ukai semina Mahathir tang sapa-sapa ba parti perintah (Barisan Nasional) nyengkaum PBB di Sarawak endang diterima enggau ati tebuka enti bela nyukung tuju penumbuh parti sida.
Maya tu mega, iya madahka diri enda ngenggaika bala tuai rumah datai ngulu pengawa ke diatur Barisan Nasional ( BN) nangika enda nemu berita dibai orang.
“Tang taja pan baka nya, bala nembiak anang ditekat ngundi nama-nama parti ke deka sida.
“Undi kitai enda ditemu orang tang anang mansal nembiak nangika kita tau belaya enggau pangan diri ketegal penemu enda sebaka,” ku iya madah baru.
Berebak enggau tu, Ali mega madah, pengering ati begulai enggau parti meseti bisi ngambika enda alah enggau jaku umbuk orang tauka diumbuk ngena duit.
Kelimpah ari nya, ku iya, semua komponen parti dalam PH bekerejasama ngambika ulih ngenataika diri ba Putra Jaya.
“Serak tu kitai dalam parti nadai bepenanggul baikka ba atur bebagika penuduk endur bediri antara pangan diri.
“Tu keterubah iya pengawa baka tu mujur diatur kitai.
“Nya alai, kitai ngasaika deka bulih pemujur serak tu diumbaka mayuh isu bisi nyadi ba menua kitai maya hari tu ti empai ulih diputarka,” pia ku iya madah.