Mawan agi nerima sukung di sitak Parlimen Saratok
SARATOK: Raban ti ngelakuka diri dalam parti Barisan Nasional ngarapka perintah berubah runding enda bekaul chalun Kaban Parlimen di Saratok rambau Pengawa Bepilih Besai ke-14 (PRU14).
Orang dagang Basil Thomas entara 1000 iku mensia mayuh ti datai ngulu Randau Ruai (sebaka enggau pengawa pemesai begulai enggau rayat) ke udah digaga ba Rumah Rehat Perintah Saratok lemai kilah ensana.
Sida ti datai begempuru ba ringkat baruh enggau atas begunan nya udah diberi penerang bekaul kuasa Komiti Pemansang enggau Pengelikun Genturung Pendiau (JKKK). Entara 1,000 iku ti datai, 200 iku nya tuai rumah lalu lapan iku penghulu.
Basil entara tiga raban ti ngelakuka diri ti udah disepunsa Parti Demokratik Progresif ( PDP) kenyau ari taun nyin kemari. Dua iku raban ke bukai iya nya orang dagang Subeng Mula enggau lutur ngeli Dr James Chella.
Nitih ku Chairman Parti Tenaga Rakyat Sarawak ( TERAS) pampang Krian Banyi Beriak madah gempuru nya nyadika pelasar raban ketuai renggat baruh mantaika sukung sida ngagai Mawan.
Iya madahka semua sida nya dekaka BN nyalunka baru Mawan ngambi ngetanka Saratok maya PRU14 ti deka datai.
Ku iya, Basil mega bisi mantaika pengingin ati iya ke deka nyaup Mawan dalam pengawa bekimpin.
Basil ukai semina betabi jari enggau Mawan tang mega sama begulai duduk sereta berandau enggau iya, ku Banyi.