Tuai rumah ditangkan ngambika enda nyain surat, petisyen sengapa
JULAU: Bala tuai rumah ba Parlimen Julau ditangkan ngambika enda sepeneka nyain enggau ngechop surat tauka petisyen sengapa enti enda nemu kebuah diberi ngagai sida.
Pemancha Datuk Janggu Banyang madah, kebuah pia, laban orang bukai tau beambi ulih ari sain sida nyengkaum ngaga pengawa ke tau ngemedis ukai semina ngagai tuai rumah aja tang mega rayat bukai.
“Kita nyadi tuai rumah bepun ari ke disukung perintah nengeri.
“Nya alai, sain jari kita tauka chop besai reti lalu enda tau dikena sengapa,” pia ku iya madah.
Iya mantaika jaku nya maya pengerami pemesai begulai enggau rayat ke diatur ba Rumah Engkulau Ambrose Jumin di Wong Besi Api ditu, kemari.
Pengerami tu digulu Kaban Parlimen Julau Datuk Joseph Salang Gandum enggau Sekretari Politik Kepala Menteri Maurice Giri.
Ku Janggu madah, beberapa iku tuai rumah ba parlimen nya diumbuk orang bukai ngambika nyain petisyen dikena nyukung orang ke deka diangkat sida nganti Salang maya Pengawa Bepilih Besai ke deka datai.
“Semua kitai udah nemu Salang agi dikeandalka Presiden Parti Rayat Sarawak ( PRS) Tan Sri Dr James Jemut Masing.
“Kami pechaya Kepala Menteri Datuk Patinggi Abang Johari Tun Openg ti nyadi Chairman Barisan Nasional (BN) Nengeri enggau Menteri Besai Datuk Seri Najib Tun Razak ke mega Chairman BN udah dipadahka Masing sentang pekara tu.
“Nya alai, ba aku pengawa sida ke bejalai mandangka diri nganti Salang tu nadai reti,” ku iya madah baru.
Kelimpah ari nya ku iya, ulah beberika duit ngambika nyukung chalun ke dikerindu sida mega enda engkeman digaga.
Sida nya mega ku iya nge- mulaka rayat ditu madahka chalun sida disukung Najib empu nyilih Salang.
Ba pekara bekaul, Janggu maya tu madahka diri andal BN deka menang baru ba Parlimen Julau kelimpah ba penuduk ke bukai di menua pesisir.
“Kebuah pia, rayat di menua pesisir berasai lantang dipegai BN.
“Sida ngenggaika penyakal laban sida mengkang randaka saup BN numbuhka macham bengkah pemansang di menua pesisir,” pia ku iya madah.
Maurice maya dipebasa bejaku ba mua mensia mayuh ba pengerami tu madahka bala raban parti komponen BN meseti nitihka jaku presiden parti sida.
“Enti kita ningkah pemutus presiden kita tau belaya enggau pangan diri lalu ngujungka penyerakup pambar.
“Tu tau bendar ngeruga penyerakup dalam BN,” ku iya madah.
Ba pengerami tu mega bala tuai rumah ke bisi datai bela madahka diri nyukung Salang nyadi chalun sereta ngetanka penuduk Parlimen Julau.